風之軌跡（校園，戀愛，籃球）: 一個終結 一個開始
啱啱果球對面犯規，所以我地中場開波。我行入球場之後，阿傑見到我就行去開波比我。
我攞到波之後慢慢行去中間三分線到，對面個控衛馬上過黎防我。
我望一望時間，第三節就黎完，我馬上傳左比傻韋。
傻韋左側攞到波之後馬上黎一個切入，我就一個無球跑動，brian見到咁嘅情況就過黎幫我pick空個位。
傻韋見到我外線三分位空左，馬上傳番出黎比我。
我一攞到波馬上一個三分起手，精準嘅投入籃框，比數38比52
「傷左都咁勁，早知你就早d出場啦」brian講
我用笑黎掩飾我隻腳其實有少少痛嘅事實。
對面見得黎幾秒就拍球等時間完，第三節就由我嘅三分黎落幕。
我地行番去休息區板凳休息，一番到去坐低果陣阿晴就行黎鬧我。
「又話唔跑同齋傳波，你啱啱兩樣都無做喎，成日都要人擔心你」阿晴對我講
「無事嘅，我就算片體鱗傷都好我都要贏，因為我應承過你」我講
「應承過我？應承過我d咩呀唔記得嘅」佢講
「記唔記得我第一日番學，放學之後上去排隊呀」我講
「個陣時你話天上嘅星星你就唔要，但係學界比賽嘅獎盃你就想揸一次。」我講
「傻瓜，我亂講都信」阿晴雙眼通紅眼有淚光咁講
「可能你真係亂講，但係只要你講我就會信」我講
「阿健你好似小說果d主角呀，跌低幾多次都會企番起身，我都好想有個男朋友係咁呀，阿晴姐姐你就好啦」小雪講
我同阿晴兩個聽到之後，我地馬上澄清我地只係朋友黎。澄清果刻我個心痛左一痛，之前嘅我幾想呢件事係事實，但係宜家嘅我只可以澄清自己。
「阿健有女朋友㗎，佢都係你學姐黎」阿晴講
「好啦，傾夠啦要開波啦」傻韋用仇視嘅眼神望住我同我講
我行左出去同傻韋講唔關我事㗎，佢對我講佢只係羨慕我姐。我拍一拍佢膀頭同佢講加油。
正式開波，由對面開。
我望一望見到anson同之前打街場屠我嘅阿威出左黎打，一個打中鋒一個打小前鋒。
對面一開波就開左比阿威，佢好快過左半場，brian企起內線防佢。
睇黎brian知佢唔會射三分，應該係頭兩節我未黎果陣同佢單打過好多次。
阿威黎左兩下crossover就直接爆入內線，brian馬上跑過去防守。
點知佢一野拋上籃板到，自己黎一個alleyoop灌籃。重要brian犯規加罰一球，佢輕輕鬆鬆射入罰球，比數38比55。
「你終於上場啦，等左你好耐，之前聽講你受左傷，本身唔知你會唔會出場。」阿威對我講
「我雖然係受傷，但係又有機會同你打，受住都要黎啦」我笑住講
「哈哈，我唔會因為你受傷就放水㗎」佢講
「我都唔想你放水」我講
講完之後佢番番去自己半場防守。
到番我地開波，我慢慢拍波過半場之後傳左比嘉豪。
嘉豪右面內線攞到波之後做出一個三威脅嘅動作。
佢突然一下加速爆入籃低，然後一個背籃單打。
我同傻韋都無球跑動，睇下會唔會有空檔。
嘉豪無選擇傳，佢直接籃下用nowitzki嘅絕技轉身fade-away 金雞獨立。
點知anson已經起嘉豪後面拍左個波走，阿威攞到個波。
佢一攞到個波又開始加速衝向我方禁區，brian完全追唔上，又灌爆我地個籃，比數拉開到38比57。
「一換番首發就打唔到啦，好廢呀」anson講
我地無人理佢，又到我地開波。
之後過左3分鐘左右，我傳左一球比傻韋射入之外就無攞過分，比數已經拉開至40比65分。
我隻腳開始企唔穩，嘉豪見到咁嘅情況就叫暫停，換我走。
「我知道你已經到極限，都差20幾分無咩機會啦，你休息啦」嘉豪對我講
我本身想話繼續打落去，可惜我隻腳已經唔聽話開始無力。
我馬上坐低起板凳到，扮到好似無事咁。
又到我地開波，對面見我換走左就又叫番d替補上場。
我望住球場，比數之後都無再拉近過。
我只可以起場邊望住佢地打，起呢幾分鐘入面時間好似過得愈黎愈慢，我愈想時間快d過，個天就好似挽我咁。
我已經唔想面對大家，我用毛巾蓋住個頭，阿晴同小雪見到我咁都無煩我。
我一個人沈思左好耐，耐到比賽都完埋，我連睇個分數嘅勇氣都無，我扶住拐杖直接走左去更衣室。
我走左入去沖涼，我從門外聽到傻韋佢地都行左入黎沖涼換衫。
我覺得我無面目見佢地，我不斷用花灑淋自己個頭希望自己可以清醒一下頭腦。
我等左成個鐘，等佢地走曬我先出黎，點知我一打開更衣室大門，就見到佢地成班人起門口等我。
「阿健我知你諗咩，你一定係諗起最困難嘅時候無一齊戰鬥，你覺得對唔住我地。」嘉豪講
「你唔好傻啦，籃球本身就唔係一個人打曬嘅運動黎，我地下次一定會打贏佢地，我保證」傻韋講
「你睇下連個傻嘅都叫你唔好傻，你都無謂繼續怪自己啦。一齊食個飯啦，啱啱訂左位食韓燒，訂埋你㗎。」阿晴講
「我.....」我忍唔住我嘅眼淚
「對唔住呀，我...」
「男人老狗喊咩姐」brian講
「我地輸慣左啦，係今年你地嘅加入我地先走到去呢步，多謝你地呀」嘉豪講
「行啦健哥哥」小雪對我講
我刷一刷眼淚，同大家講「下次我，唔係！係以後嘅比賽我都會贏落去」
「知啦，行啦風之子」阿晴對我講