【穿越】【三國】 流離者(不定期更新): 52

「暗渡陳倉。」我接着說。

「明燒棧道下嘛？」呂布一臉疑惑。

「明 修 棧 道！」我字正腔圓的再說一次

「雖然曾係典藉中睇過張良獻計燒棧道，後有韓信領軍暗渡陳倉助高祖出關，但咩修棧道就並未聽過，麻煩李兄弟講明白啲。」呂布一改那故作溫柔的微笑，誠懇的問道。

Shit ! 唔記得咗正史冇明修棧道，係後加㗎添。





「我想話韓信暗渡陳倉之計雖然可以殺人一個措手不及，但其實三秦依然重兵，假若佢哋冇疏於職守可能我哋大漢都不存，如果當時韓信命人修築蜀道，令三秦重兵看守蜀道，暗渡陳倉就能更加順暢。」我連忙編起謊話。

「我軍又唔喺蜀中，修蜀道做咩？」高順疑惑道。

「好彩當時李兄弟冇死喺劉備劍下，如果唔係呢條妙計就冇機會留名青史。」呂布無視高順向我說道。

「張遼，等高順點完八百精兵，你就揚住我嘅師旗，大張旗鼓咁喺大路行軍，遇敵立即點起狼煙但只可對峙，不可交戰，直至我哋點起狼煙先可以揮軍進攻。」呂布仔細吩咐。

於呂布而言，肯定是第一次聽到此計，但卻能立刻領會，還能靈活運用，此等智慧，又豈會是後人口中的「有勇無謀」。





「主公想親率精兵突襲，我哋點可以要主師突擊，都係等我領兵突擊。」張遼連忙道。

「但係你……，你怕我會有閃失，未免太睇少我！」呂布挺着細小的身軀，卻用着極其自傲的說着。

「我知主公勇猛無匹，但都冇必要咁，就算大人唔想我領軍，都可以叫高順領軍。」張遼繼續勸諫。

「已經決定咗，而且我唔去就冇意思。」呂布斬釘截鐵的說。

「而且指揮大隊猶關重要，你有咩差池我哋就真係會有閃失。」呂布不忘提醒張遼。





「哈……」張遼不情不願地應允。

未幾，高順便帶同一隊人馬到呂布跟前。

「主公，在下已經挑選咗八百精銳。」高順道。

「好。」呂布應答過高順後，轉身向我打量一番。

「高順我哋仲有冇盔冑畀佢著？」打量完之後，就向高順問道。

「有呀，應該岩李兄弟身型。」高順也上下打量一下後說。

「拎過嚟畀佢著，順便還埋佢啲嘢比佢。」呂布吩咐高順。

一陣子，高順竟然拉着墨犬過來，本以為墨犬早已被殺，這次失而復得是我唯一的喜悅。





「墨犬…」我衝過去抱緊墨犬，但墨犬反常地默不作聲，沒有將我推開。

「我哋係搵到你嘅地方見到佢企係你側面一動不動，而且身上有咬斷嘅繩索，睇嚟佢掙脫之後守喺你旁邊。」高順說。

「著起佢！」高順遞了一套盔冑和青缸劍給我。

我看向呂布。

「當時我哋將士聽到聲就意外救咗你一命，我見你周圍有幾具身有刀傷且衣衫不整嘅男屍同埋小公主被污辱過嘅屍體，而你手中拎住嘅青缸劍又染血，睇嚟嗰幾個狀漢係你殺㗎啦。」呂布淡然說道。

「就係嗰幾個禽獸殺咗小白，就咁斬死佢哋到未夠呀！」我憤怒的吼叫。

「我唔知成件事嘅來龍去脈，亦唔知點解墨犬同青缸劍會喺你度，我呢一刻亦唔想嘥時間追究，但你話要報仇就唔該你唔好得吧口。」呂布續道。





「你唔懷疑我？」我問道。

「墨犬連我都唔跟但係跟你，有時野獸嘅直覺畀人仲好，加上而家我唔理得咁多，我哋利害一致，就當我搏一鋪。」現在才發覺，呂布看我的視線早已毫無敵意。

我默不作聲，靜靜地穿上那套盔甲，繫好青缸劍，跨上墨犬，這只事那些軍人再平凡不過的行動，但於我而言，卻是下定決心，表明意志的一刻。

此時我心裡只想着小白的仇與小南的淚，我一定要殺死趙文。

在預備之時，全軍早已整裝候命。

「各自行事，狼煙為記，出征！」呂布高呼。