[高中][少甜]《如陽光伴我》: 四十，海豚麵包店（中）

洗澡後，我終於重新開始自己的工作。在日本的時候，堆積了一大堆的WhatsApp沒有回應，開始放暑假，基本上是我們這個行業的旺季。

一開始經營這門生意的時候，我有擔心過客人在得到對方的電話之後會跳過我，直接交易。後來發現這種擔心是多餘的，因為只要她或他拒絕支付佣金的話，我就會永遠把他們放進黑名單。

但大部份的大學生都需要一個以上的學生，又或者不幸遇到糟糕的家長被裁，都需要找上我，家長的那方面亦然，所以理性上，建立長期的合作關係才是對雙方有利的最佳選擇。

當然偶爾也有走數這種的情況出現，但實屬少數。

逐一回應之後，道理上應該能夠順利獲得不錯的佣金。想到未來一個月應該也要不停在將軍澳區出入，我也趁機多接了幾個住在那邊的學生，填補一下和晴補習之前的時間空隙。



要是我到她家的話，晴喜歡在下午茶時分才開始補習，因為她每次都想要我吃過晚飯之後才走，她說這樣時間比較合適。

有時我會覺得有點不好意思，不想再收她補習的錢，但她總是硬要塞給我，要是我不願意的話，她就會趁我不為意的時候，放進我的背包。

「數還數、路還路啊！唔好玩嘢喎靚仔！」

「好似又食又拎咁...」

「你有幫我補習㗎！」



「咁所以你都有請我食飯做補償。」

「兩樣嘢點同呢！反正都要煮飯㗎啦，多個人多雙筷姐。」她說，「如果你想報答我既話，有件事我想拜托你嫁。」

「做到一定做。」我說。

「...其實係咁嘅，」她有點不好意思的說，「之前住喺香港仔嘅時候，細個既時候每逢生日，屋企人都會買一間小店嘅蛋糕俾我食，食咗好多年。升左中學之後，就算我同嫲嫲無親身去拎，每年生日我班死黨，姐係阿糖佢地都會買嚟送俾我。不過搬屋後，我少左同佢地聯絡，而家自己隻腳又傷左，嫲嫲又去唔到咁遠...」

「你想我去幫你買？」



「部份正確！其實我已經打電話去訂左㗎啦。到我生日前一、兩日，你拎呢到既錢去攞就得！」她拿出幾張100元說。

「又話而家閱讀卷冇呢個選項。」我說，「唔使啦，你請我食左咁多餐，生日請你食個蛋糕可以掛？」

「好啦！多謝你啊。大哥哥，生日嗰日你會陪我嫁可？」

「當然會，到時如果你好返少少，帶你去附近食野又點話。」

「嗯嗯，我今次想食吉野家！」

「又食吉野家，不如話食M記啦。」我開玩笑的說。

「都好啊，十七歲既願望就係去食好多個肥美又多汁既豬柳強，好好咁放縱自己一日…之後先重投DSE既懷抱。」

「好慘痛既生活。」我想起自己中六的那一年。



回來大約一星期後，軒致電給我，用香港的電話號碼。

「喂仆街仔，睇你ig story，你去左日本唔搵我既？」

「大佬我去東京唔係沖繩，距離好遠下…」

「你上次走既時候曾經話過，只要我地再喺同一個時區，你就會娶我…」軒扮女聲說。

「收皮啦你…我幾時有咁講過。話時話，你返左香港咩？暑假係潛水旺季喎。」

「呢個都係我打俾你既目的。」他吞口水說，「我應該呢一、兩年都唔返去啦！即管約我啦Baby！」

「…你早兩個月先講到要喺沖繩尋找自我，同未出現既新恒結衣共度生與死，而家又反口？」



「いいえ！NONONO！我已經搵到我既新恒結衣啦。就係喺你走之前既嗰兩日，我遇到一個充滿仙氣既香港女仔跟我學浮水，佢同我理想中既情人一模一樣。我膽粗粗咁喺離開沖繩走之前約佢，而家佢已經係我未來老婆啦。」他興奮地說。

「…又會咁順利都有。」我有點不岔。

「世事難料啊，講起上嚟都要多謝你，如果唔係你，我就唔會推曬啲旅行社既Booking，亦都唔會遇到你阿嫂。」軒的聲音甜得讓我有點發毛。

「阿嫂…佢咩人嚟嫁？」

「佢叫阿秋，同我同年。我咁夏天，就係阿夏啦，我地連住嫁，係唔係好夾呢？唔洗知佢係咩人，睇個名就知係命中注定。」

「完全唔明你個logic…咁佢又要搵阿冬？得啦得啦…仲話叫我娶你，根本自己有曬打算。」

「我決定左返嚟搵錢，儲夠錢就會結婚，然後睇下有無機會返沖繩，始終都係會掛住咁靚既太平洋。啊，結婚你一定要做我伴郎，無你我唔會結。」

「嗯嗯。」救命，他是十日內第二個跟我說想要結婚的人，我才22歲。



「『嗯嗯』…？點解你用字成個少女咁？做左絕育手術？你最近係唔係一邊自慰一邊『嗯嗯』、『嗯嗯』咁樣？」他恥笑我。

「…」

「我知啦，上次你講嗰個女仔。兄弟，你把聲比起上次見你開心返好多，唔錯唔錯！」他很高興。

「大概係，似乎佢對我既影響比我相像中高好多。」我想了想，覺得自己好像說得太多，「喂，你到底打比我做咩？」

「無啊。純粹係想同你講我返左香港，隨時可以見面。」軒說。

「嗯，一定要見面。」我說。