[高中][少甜]《如陽光伴我》: 四十，海豚麵包店（上）

回到香港之後，我第一時間到表哥的家接回橙。

「唔該晒，表哥。差你一餐飯。佢乖唔乖？」

「挑，一世人兩表兄弟計乜嘢。佢乖呀，超級乖。幾乎冇郁過。而且我開始明你話佢有靈性係咩意思，佢對眼好似識講野咁。」表哥說，「當然佢冇咩點同我玩過或者傾下計...」

「佢係比較睇心情。」我說。

「喵...」在旁的橙示威。



「佢應該係掛住你啦。你就好啦，隻貓咁嗲，以前養嗰兩隻都無咁甜。」

「我係幾好彩。總言之，呢幾日麻煩你了。」

「其實我無做過咩，做地盤既返工返足六日，返到屋企有時好似無左半條命咁。」

「我聽講有啲人做得好舒服。」我說。

「人就得咁多，養左啲死懶鬼自然就要我地後生仔填嫁啦…我仲想升職結婚嫁。」



「無問題既，有麝自然香。」

「諗住下年擺酒同你表嫂結婚，希望儲夠數啦。」

「仲係嗰個？」我笑著說。

「係啊仆街仔。到時你唔好唔嚟啊！仲有，記住我同你講過咩啊。」他拍我肩膀。

「嗯。收到。」



應該是上一次橙「消失」令我有點陰影，不敢讓她在室外逗留太耐，而且表哥住的村屋跟我住的地方很接近，所以就直接跳上了的士回家。

回家的途中，我想了很多有關家人的事。

老實說，我大概有很多可以討厭姨姨的原因，但現在真的都沒有放在心上了。只是單純的沒有原因想跟她和叔叔見面，即使見到面，也不知道應該要說些甚麼。

除了血緣之外，我和家人之間好像已經沒有任何可以稱得上連繫的事。

我一打開家門，橙就立馬跳上床。

從她的步姿看起來，應該重新長回了不少肉，回復到失蹤之前的正常體重，看起來這幾天她除了吃詩晴那些罐頭之外，真的完全沒有動過。

整天除了聽音樂、看書，幾乎甚麼也沒有做過 ，晚餐也只是隨便弄的三文治。旅遊回來之後的第一天，總需要花點時間重新調節心情。

除此之外，我在睡覺之前撥了電話跟晴聊了一會兒。



「跌打師傅話我隻腳應該無大礙，純粹扭親...休息一頭半個月應該冇問題。」

「錯有錯着啦，努力自閉溫書。」

「月尾生日啦，想出去玩一兩日都好！本來諗住返香港仔搵返啲舊朋友見見面，暑假點可以日日都留係屋企㗎。」

她有點不高興的說。
「你幾時生日？」

「7月26，暑假生日真係好慘！除左好朋友，基本上無人會同自己講生日快樂。幼稚園既時候連生日會都無啊！」她說。

「唔緊要，今年會多一個人同你講生日快樂。」

「嘻，多謝喎。咁你生日呢？從來都冇聽你講過。」



「5月3。」

「過咗啦喎！點解嗰時你唔講嘅！」

「吾，我覺得冇乜特別。」我說。

「點會唔特別！」

「你想要咩生日禮物？」

「唔要呀，我今年都冇送生日禮物比你，咁樣唔公平。下年先啦！」她笑著說。

「好啊。」



「有時我真係分唔清到底你係真蠢定係假傻，真係唔識氹女仔定係扮唔識！」她顯然真的很困惱。

「好難捉摸啊。」我用羅家英口吻說出，她隔着電話大笑著。

「好啦你都攰㗎啦。俾我煩左咁多日，早啲休息！」
「嗯，你都係，小心隻腳。」

「早抖！」她甜蜜的說。
「早抖。」

掛線之後，很快我便我抱著橙入眠。

在夢中，我變了一隻和橙一樣的三色貓，只是頭上的黑色毛比較多一點，如果我是自己的主人的話，大概會被叫成「黑」。

我和夢中的「橙」就在村內隨便跑著，橙在夢中跟我說了很多話，但我幾乎都想不起。



我只記得自己也跟她說了很多自己的近況，我不知道為甚麼要解釋這種事，她明明每天都跟我在一起。

後來的情節都很模糊不清。只記得後來有一群並非來自公園和垃圾站的貓想要拼命抓着橙，我奮力反抗，之後就醒了。

奇怪的夢。

醒來後，橙仍然很安穩的睡在我身旁，這刻我也很想知道，到底橙會否做夢，又會否夢到自己變成人類？