[高中][少甜]《如陽光伴我》: 負一，豪（下）
2012年6月22日 星期五 雨
對唔住…豪…對唔住…經過你面前，我唔係有心唔理你…但我唔想…我唔可以再同你聯絡…我唔可以再傷害你，我明知自己係會離開，要你忘記我呢個朋友係最好既方法…
對唔住…
2012年7月6日 星期五 雨
上左機啦。一切都返唔到轉頭，我同陽光補習社，我同豪…
再見啦，咁多位。我一定會堅強落去，一定會…你地都要，你地一定可以入到大學嫁…我知道。豪，我知道你得嫁…好抱歉…連一聲再見都無講…
大概唔會再有機會見啦…
2012年10月7日 星期日 陰
今日寄左信比豪，唔知佢收到會點呢？會唔會好憎我，好嬲我。好開心可以再同佢聯絡…本來已經下定決心，唔可以再傷害佢…但係琳話豪個傻仔完全唔肯溫書，日日流連機鋪…點可以嫁！
點可以因為我而咁樣影響佢既人生…唔可以… :(
都唔可以用WhatsApp，如果傾到停唔到咁點算啊？我會唔捨得…我會好唔捨得…係啦，我一定可以鼓勵到佢，佢一定要入到中大，咁樣佢既前途一定會好好，佢係叻仔…佢係我見過最有拼勁既人…
一定可以！
2012年12月26日 星期六 雨
哥哥返左英國，琴日接我返York既屋企，我好唔想返去…明明只係幾日，都已經要打打鬧鬧…我好想可以過一個開心既聖誕節，有一個正常既屋企…
上年既12月26日…我同豪過得好開心好開心…如果可以永遠停留係2011年既12月26日就好啦…唔緊要…我決定左啦...
反正已經係最後一個聖誕節…等豪佢地放榜之後，我就唔洗再過咁樣既日子…
2012年12月29日 星期六 晴
一返到倫敦屋企就收到豪既回信啦！點解倫敦郵政咁慢手腳，唔係聖誕前到嫁！不過諗諗下，時間剛剛好～～：D
上年16歲生日收唔到豪既祝福，今年居然可以收到，實在太好啦！好開心佢重新讀返書，好開心佢有努力，聽到「邦民林俊傑」都各自搵到自己既目標同幸福，我真係好開心好開心…
未來就算係另一個世界見到佢地，佢地都一定可以好似而家咁幸福…等豪入到大學之後，佢都可以搵到值得佢追求既幸福。
2013年3月21日 星期三 雨
我愛你…我好想話比你知我愛你…你知唔知道我聽左the whole new world幾多次…你知唔知…我好掛住你…好掛住以前個d日子…我好想同你講野…我好想打比你…
但我唔可以…我只能夠呃你，既然dse已經完左…我而家可以話比你知我同Jayden一齊左…咁樣你就會死心，係大學重新識過一個愛你既人…
一個正常既人，得到正常既感情…我會換過曬電話、地址…你都唔會知道之後既事…
永遠你都會係一個開心快樂既人…對唔住…我好自私，但我真係再行唔到落去…我好想你可以好似以前咁樣鼓勵我…
我有啊，我有「吸氣吸到上頭殼頂，呼氣呼到落腳指尾」，我有噓、噓、噓，點解無舒服d既…點解…
2013年10月19日 星期一 雨
唔想返學。好煩好討厭。又諗起以前既生活。
2013年10月21日 星期三 雨
連續幾日無返學。反正都無所謂啦，好快一切都完啦。
2013年10月22日 星期四 雨晴
豪嚟左倫敦搵我啊。
傻仔…原來佢已經鐘意左我好耐，原來佢已經等左我幾日啦，原來我一直都唔知，點解我咁蠢要走堂唔返學啊！
今日落大雨，見到面之後我地都全身濕曬，我帶左佢返嚟，之後佢就攬住我…仲錫左我一啖。我個心跳得好快好快，feel到成塊面都紅曬。
一直以來，佢就好似太陽咁比左好多好多溫暖我，就連我去左倫敦…佢都有方法可以搵到我。
個傻仔而家係大學生啦！唔知係唔係我幾封信有用呢？如果係真係太好啦。好開心啊今日真係！係呢一年來最滿足既一日。
啊！返到屋企仲比Nancy笑我帶男仔返房！佢問豪係唔係我男朋友，嘿，我諗應該係掛？
2013年10月24日 星期六 晴
呢兩日過得又開心又難過。開心係因為豪，唔開心都係因為豪。
見返佢之前，從來都唔知原來倫敦係一個咁浪漫既城市。不過佢走左啦。返左去好遠好遠既香港，我同佢過左好滿足既兩日，不過就剩係得兩日。
臨別之際，佢話我地一定會再見嫁，佢會努力搵錢，好快可以探我，甚至一齊住。我好愛呢個男仔，我知呢個男仔都好愛我。我先前仲諗埋咁多蠢野…
唔可以再諗啊！如果好似豪講既咁，好快我地就可以有新既生活，佢會去歐洲，我地會有我地既未來，我唔洗再自己一個面對啦，好快就會捱過，一定會捱過！
P.S. 喺機場既時候訓左喺阿豪膊頭一陣，發左一個好奇怪好奇怪既夢。不過如果真係會夢想成真，好似都唔錯~
2013年12月3日 星期二 陰
最近一直都係過緊差唔多但係幸福既生活。返學放學、準備A－level、同豪WhatsApp仲有傾電話，雖然無咩好特別既事，但反而比以前既每一日都來得快樂。
不過，咁既生活真係屬於我？有時覺得，幸福只係暫借返嚟。豪好辛苦每日每夜咁返工，又同屋企人鬧交，全部都係因為我，如果唔係我，佢其實唔洗咁辛苦嫁…
係啦，我都可以有野幫下佢，如果我大學都可以去德國讀既話，咁佢未唔洗再另外儲錢去英國搵我囉！雖然屋企人未必肯…不過一定要問下，當係為左我地既未來。
2013年12月26日 星期四 雨
結果都係唔可以。
一定要留返喺英國。我只不過係想問下…但結果當然都係好難聽嘅說話...如果唔係哥哥，可能又要挨打啦。
唔緊要啦，其實已經唔再痛。最痛嘅係要令一個全心全意愛我嘅人咁辛苦。
我連少少可以幫阿豪減壓嘅事都做唔到。點解我咁無用？
一切都係因為我而起。
或者唔係我自私嘅話，豪可能一早就已經放低左我，過好好嘅日子。
或者我根本唔應該存在。
只要我從來冇出現過，咁豪就唔會同屋企人鬧交，唔使返工返學讀書學德文咁辛苦，唔需要有一段畸形嘅長距離戀愛。
既然一切問題因我而產生，咁一切問題都應該由我去結束。
2014年3月27日 星期四 陰
豪今日正式坐飛機去德國。
要佢放棄香港嘅學位，咁樣根本唔係一件好事...但係個傻仔無論點都話一定要過嚟，不過點都好，或者歐洲嘅天氣、人同事，會令佢將來開心過係香港？
我開始冇辦法分辨乜嘢係啱乜嘢係錯，乜嘢係開心乜嘢係唔開心。我淨係知道，我嘅幸福全部都係嚟自佢。
好快就可以見到佢啦。好想呢日快少少到，但又好唔想呢日到。
本來應該要準備緊A-level，但依家都唔想再浪費時間，反正都再冇意思啦。雖然豪好似唔敢打擾我咁，我都唔敢同佢講我冇溫書，不過我啲時間有其他用嫁！
我有好俾心機咁樣準備我哋嚟緊嘅旅行，仲有好努力幫啲同學補習，賺少少錢，咁樣到時去旅行就可以唔收阿豪旅費。（個傻仔一定唔肯！不過我一定唔會俾佢有機會比錢我！）
未必幫到好多...希望可以減輕少少佢嘅壓力啦。而且第時唔使再過嚟搵我，佢之前喺香港搵落嘅應該都夠用既！
2014年6月19日 星期四 晴
旅程正式完結，如無意外應該係我最後一次見到豪啦。
臨走之前，我將結他交咗比佢保管，我話，呢支結他係我既最愛，無論點都唔可以俾第二個女仔彈㗎～我會呷醋！好細路女啊！
呢幾日我真係過得好開心好開心。真嫁！
大概我同佢，都唔會有另外一個更加圓滿嘅結局。既然係咁，又點解傷感呢？
如果夢入面講嘅係真就好啦，咁我就唔需要驚會再見唔到傻仔啦～2014年7月31日 星期四 晴
豪。
係時候要講再見啦。
多謝你用魔毯送比我既呢一段奇幻旅程。好對唔住，無辦法同你創造一個只屬於我同你既世界。
喂，傻仔。
如果真係有來生既話，你願唔願意再愛我一次啊？
一次。
一次就夠啦。
我愛你。