[高中][少甜]《如陽光伴我》: 負一，豪（中）

2012年3月8日 星期四 晴

辯論隊入到四強，本來都係平常咁準備，無咩特別，不過陽光就發生左一件大件事啊！

個阿俊帶人去踢館...5對4，5盤3勝，我完全唔知道件咁既事…阿俊一定係知道我好忙，所以先咁衰！好嬲啊！！！我好想可以保護學會、仲有保護我班朋友，我唔可以將陽光交比佢地！

不過我上到去既時候已經係最後一局啦，2比2平手，我當時好擔心，好想可以幫手。

但豪唔比我咁做，佢唔係唔信我，但佢話好想可以靠自己…我睇到佢既眼神係好堅定，從來都無試過咁堅定。



我諗，可能學會對佢來講都係好重要，就好似學會對我咁。最後佢輕鬆取勝～～～～～

果然係我好徒弟，佢仲話要請我食飯，算佢識做啦！


2012年3月23日 星期五 陰

琴晚發左個好奇怪奇怪奇怪既夢。

我夢到豪，其實已經唔係第一次啦，不過琴日個夢係…我同佢一齊左，而且做左好多好多情侶先會做既事，地點係倫敦，大概都係《綿綿》呢首歌既情節。



死啦！會唔會係因為我最近睇得太多亦舒呢？係夢入面我好愛好愛佢…好想同佢永永遠遠係埋一齊，但係就因為好多討厭既原因而無辦法咁做…會唔會係真既呢？

唔知點解起身一諗到咁就好灰啦。平時明明夢見豪都係好開心既事！

最近少左好多同佢聯繫…佢都無搵我…係唔係因為我唔好呢？

唔知個傻仔呢排點，有無努力讀書、練波。最衰都係我…忙到咁，明明講好左要食飯，但係又抽唔到時間，好討厭啊！:(

2012年4月21日 星期六 雨 晴！



今日發生左好多好多事，不過幾乎全部都係開心事。起身既時候黎m好唔舒服，又落大雨，本身仲諗住成日都會超級唔開心，不過竟然相反。

落大雨，豪場足球比賽delay左，我直接去左足球場搵佢。原來佢除左讀書唔差、講野好笑，運動既時候都幾型嫁喎！

雖然有d M痛，不過我不停咁為佢打氣，嘿，最後球致勝入波我覺得佢有好大功勞嫁（雖然我完全唔識足球），我覺得我既打氣都有少少用。

比賽完左之後，為左要拖時間，我提議要去睇電影，我地睇左兩套戲，戲院凍到傻啊，不過豪好細心咁準備左外套，仲要唔係一早知會睇戲，我覺得男仔黎講，佢已經算好細心嫁啦！

豪話要同我一齊睇曬Lily Collins既戲，唔知我地仲會唔會有機會睇戲呢？

有就好啦！因為同佢睇戲好平嫁，佢教我偷偷換戲院，一張飛睇幾套戲，原來真係得嫁喎（？）

完場之後，有個哥哥入黎想捉我地，豪拖住我隻手跑左出去…我心跳得好快好快，從來都無試過咁…唔係因為驚比人捉到，而係…佢捉住我隻手既時候，我有一種開心又緊張既感覺，好怪啊我最近…



唱K既時候，佢好細心咁幫我點左熱飲。我趁唱《綿綿》既時候同佢講左我既夢、問佢有無鐘意既人，佢話無。

唔知點解，個一刻我覺得好失落好down，我到底諗緊咩呢？好難明啊！

不過失落只係維持左好短時間，琳佢地趕到啦！個Surprise大成功！我覺得自己都應記一功嫁～～～可以令豪開心，我覺得好開心好滿足，因為佢係我好好好好既朋友，希望佢每個生日都會有我，仲有佢地六個啦。: D

2012年5月15日 星期二 雨

今日拎左冠軍，本來應該係好開心既事，係我一直以來既夢想。但係…好失落。佢明明答應左我會同我影相，我最開心既時刻…我好想佢會係到…佢地推我上台，我落返黎既時候，佢已經唔見左…

我好膽心又好唔開心，佢係唔係屋企有咩事？佢係唔係討厭我？

…我好憎我自己 :(




2012年6月7日 星期四 雨

豪發我脾氣。唔知點解佢要咁講…我好想喊，不停咁喊…豪佢係唔係討厭我？

點解一切會變得咁快，我好掛住佢…我好想可以好好同佢傾下，我好想同佢道歉，咩都好…之後可能再唔會有機會啦…

點解，點解，點解會咁？好辛苦…我仲可以同邊個講…

2012年6月20日 星期三 雨

爸爸媽媽返左黎，話我完左考試就要即刻去英國，我唔想，我求佢地比我考埋DSE，係香港讀大學，佢地唔比，我喊到傻左…爸爸打我，好似以前咁…成件tee都係血。

媽媽幫我止血，鬧我，叫我唔好再激爸爸…我唔想咁…呢一年，我以為我可以離開呢個屋企，但原來根本就唔得…無論我跑得幾遠，我總係會被吸返返黎…根本無其他方法…要離開只有一個方法…

好痛。身體已經慣左，但我個心好痛好痛…我仲有好多野想同豪做…點解？



點解偏偏我要係黎心如…