[高中][少甜]《如陽光伴我》: 負一，豪（上）
2011年11月14日 星期一 晴
今日無返到學。又無陽光補習社、又無辯論隊訓練，琴晚訓得好差，醒左3、4次，藥又搞到我好辛苦。最近要準備校際音樂節超辛苦，所以自己請一日假！
唔知點解，突然好想搵下豪送比我既唐老鴨盒裝朱古力（舊野真係超奇怪！），睇下邊到買，但搵左好多間元朗既鋪頭，店員都話無。
一路搵一路諗：點會呢？唔通絕左版？！最後去到一間便利店，個店員姐姐笑得好開心咁問我：「係唔係一個個樣傻更更既男仔送嫁？」，我每次諗起阿豪個樣就想笑，當然答係啦！
佢笑住咁話幾日前見到個男仔買左一盒朱古力，倒曬d朱古力出黎重新入落去個唐老鴨盒到，仲話永遠都唔會唔記得，因為實在係太核突！
搞錯啊！佢點可以咁樣講嫁…原來係阿豪自己整既（？！），點解佢要為我咁樣做？
但無論如何，我都決定要回禮。^^
2011年12月1日 星期四 晴
整好份禮物啦：D！
係一隻我親手刻既唐老鴨鎖匙扣，搞左好耐終於刻好啦。不過睇睇下…又覺得唔係幾好，好似好核突咁…
仲有，如果送左比佢，會唔會有咩誤會嫁？佢當面拒絕我咁就好odd啦:（就算我唔覺得自己係鐘意佢都好…
都係送一本唐老鴨簿仔比佢個傻仔算啦！咁理由都合理d，叫佢要...
溫！英！文！抄！生！字！
英文唔好就入唔到u嫁啦，我好想佢都可以入到大學…其實唔只係阿豪，仲有邦同傑，仲有陽光既各位，我都好想好想佢地入曬同我同一間大學，咁樣我地就可以一路每星期見面啦。
仲有機會可以好似豪講既咁，六個一齊去蘇格蘭既大草地唱歌煮野食。
我會努力幫手！FIGHTING！
P.S. 啊！個傻仔差少少就係我面前打開本唐老鴨簿，如果佢見到我畫幅畫，氣氛一定超超超尷尬！
2011年12月22日 星期二 晴
今日係聖誕假前最後既陽光集會。
好唔捨得啊。下學期就要開始返辯論比賽，雖然我好享受係debate既時間，不過同陽光都係唔同，係陽光我唔單單有滿足感，同佢地仲好似…一家人咁。
我真係好唔捨得啊…我甚至居然諗，如果下學校快d輸左比賽，係唔係就可以即刻返去陽光呢？點解我會諗咁蠢既野嫁？
最近要準備聖誕節既教會party同表演，基本上都無時間處理其他野，成個假期好似得26號有時間，我見有兩張disney飛，就問豪有無時間…
其實我都唔知自己點解會想問佢，可能係覺得同佢一齊去會開心？本來都係打定輸數，不過估唔到佢竟然得閒又想去。好野！好快可以第一次去Disney啦～～～～～～：D
2011年12月25日 星期日 陰
教會既野終於完左啦！好辛苦啊，雖然可以帶比小朋友歡樂既感覺係一件好事，不過實在係太無聊啦…
聖誕節唔係應該同喜歡既人一齊過咩？就算而家我未有喜歡既人…但我都會想同朋友一齊過…
算啦！都慣啦，慣左16年，點解而家先黎抱怨？比屋企人聽到又一定會打我打到傻。
2011年12月26日 星期一 晴
今！日！係！16年！來！過！得！最！開！心！既！boxing day！
估唔到原來迪士尼真係咁咁咁咁咁咁咁好玩嫁！而且豪呢個旅伴都係好好…雖然個衰人呃左我去坐過山車…但原來好爽嫁！
大叫既話，可以將平時最唔開心既事叫曬出黎，即刻成個人開心好多好多。個傻仔去到小小世界，竟然大聲唱歌…笑死我啦：D 蠢到佢咁既人我都係第一次見。
♫人人常歡笑，不要眼淚掉，時時懷希望，不必心裡跳！♫
我如果可以做到首歌講既野就好啦～不過我覺得我行緊去正確既方向！多謝陽光…多謝啊豪！
最尾播The whole new world放煙花既時候，係應該想要最愛既人係身邊？不過我覺得豪係我身邊我都覺得好開心。真嫁！
黎心如！你要記住今日既感覺，一唔開心就要拎返呢篇出黎睇，知唔知啊？
2011年12月29日 星期四 陰
生日快樂！
正正式式咁踏入16歲lu，其實一路都無咩特別生日唔生日，反正屋企人由細到大都唔會同我慶祝嫁啦。不過今年唔知點解好想有人同自己講生日快樂…
無都唔緊要啦！今個學期對我黎講，已經係最好既禮物，最好最好最好既禮物！好似我咁既人，要知足先得嫁~
2012年1月1日 星期六 晴
新一年啦，照舊都係工作中渡過，2月就係校際音樂節，又驚遲下debate team要比賽既時候分身不遐，Miss一直好努力篤促我訓練…
好煩啊，到底我媽媽比左幾多錢佢要佢一直咁樣煩我…就好似每日每夜都要監視我咁，WhatsApp又要我定時定候報到、應機。
我好努力嫁啦真係…點解佢地就係唔可以比我透下氣喎！
返到屋企就要溫書，一直溫到過左12點都唔知，不過豪send左個WhatsApp比我，話祝我新年快樂，仲有生日快樂！
嘿，雖然遲左兩三日，不過原來有人記得我生日，開心返曬啦。佢話今年會更好，希望啦，至少今晚應該唔會失眠～都算係一個好既開始！
2012年2月22日 星期三 晴
下學期開始啦，忙到抽筋啊！就快吊頸都無得透氣…除左頒獎影相個日之外，我地六個好似就無齊人過啦。
阿sir調左位，豪唔係同我坐，M2堂都無得笑佢lu :(。不過今日放學之後，豪見我好似悶悶不樂咁，教左我「吸氣吸到上頭殼頂，呼氣呼到落腳指尾」，笑死我啦：D，佢仲示範埋比我睇，個人誇張到傻！
嘿，但好似真係有用咁喎，今晚成個人輕鬆曬～唔知係因為佢既呼吸法定係佢既傾力演出呢？下次無人我都要自己嘗試下！
2012年3月6日 星期二 陰
好悶啊 :(！今日明明係星期二，但係就要debate開會，好想上去陽光補習社搵佢地啊！
聽琳講，豪佢地最近都好忙，我好想可以上去幫手…但結果我地呢面開會開到成6點，我上到5c班房既時候佢地已經一早走曬啦…
好灰啊。
希望星期四可以見到啦！