[高中][少甜]《如陽光伴我》: 三十四，抱著欣賞每顆星（上）

中六的二月份，快要正式離開學校的時候，我收到心如的第二封信。看到她親筆寫上我的地址，心中就是一暖，看來她的字跡並沒有因為時差或距離而改變。我沒有馬上拆開她的信，而是先好好的放著，等心情平靜的時候才打開。
 
//
豪：
 
新年快樂。仲有補祝你聖誕快樂。
 
總算捱過左2012年，原來世界末日真係假嫁，我都終於17歲啦。17歲嘅感覺好奇怪，好似即將要踏入夢寐以求嘅成年階段，但係諗返轉頭又覺得一切來得太快，好似仲未準備好咁，我比你遲咗九個月先明白呢種感受。
 
喂！點解我係「豪乳邦民林俊傑」入面惟一一個要改讀音，而且係改埋個核突名嘅人啊？唔公平啊！不過呢，聽到一個二個既好消息真係太值得開心啦。一早估到琳同俊會喺埋一齊啦！雖然好似馬後炮咁，但佢地一直都有眉來眼去！我見到。估唔到傑個怕醜仔竟然有拖拍，佢開心返就好啦。仲有希望雯同邦可以長長久久啦...雖然佢地睇落完全唔夾，但唔經唔覺都就一年啦。


 
你啊，聽到你有返心機準備考試，我就放心啦。唔使俾咁大壓力自己嫁，俾心機就得。我相信以你嘅聰明才智，只要你平常心面對，入大學絕對輕鬆無難度！我估你應該好輕易就可以有25分以上，中大等緊你！
 
隔咗咁耐先覆，真係好抱歉。因為要準備考試，所以過去兩個月基本上都好忙。記得平安夜，宿舍有一大班non-local一齊慶祝，不過基本上都無辨法搵到方法可以融入佢哋。或者咁講，我從來都好少搵到方法融入任何人...甚至係我嘅屋企人。
 
聖誕節哥哥揸車嚟咗接我返屋企過幾日，其實我真係好唔想返去，好驚好驚佢地。我甚至好討厭佢地所有人，但係我永遠都無方法可以離開。媽媽叫我記住，佢地叫我做既事，我都一定要照做，因為我擁有既野都係佢地俾我，我一定要感激。但有時我真係做唔到…
 
哥哥喺香港執業，無跟我哋移民過嚟，只係聖誕節之後有幾日假期。哥哥由細到大都好叻，係佢地眼中最完美嘅結晶品，成績、性格、外表、體格，叻既野多到數唔曬，運動、音樂。哥哥從來都冇令過佢地失望過，連揀女朋友都一樣，由小學去到大學畢業都係傳統名校，同女朋友一樣係英國名牌大學一級榮譽畢業。
 
但我就一次又一次令人失望。升中面試前我開始發育，第一次感受到嗰一種下半身劇痛的感覺。派位入唔到最頂級既學校，媽媽覺得好羞恥，甚至唔願意同其他朋友講我喺邊度讀書。有一段好長嘅時間，我連返學都唔想，我知道咁諗好唔啱，但係連我自己都覺得好醜。


 
每晚要瞓覺嘅時候，我都好驚好驚，所有聲音都唔想聽到，覺得好恐怖。醫生話咁樣係一種病，有好多藥要食，血清素（姐係朱古力有既野！你教我既！）、鎮靜藥、安眠藥，血清素初期食完會好想作嘔，但已經係副作用最少嫁啦…其他藥食完會頭暈暈、無精神，個人好似無曬力咁...識到你地成班，係我經歷過最幸福既事，16歲既我好似有返人生既希望。我搵到屬於自己既目標同理想，但17歲既我就俾人捉返入去籠入面，永遠上鎖。
 
對唔住啊...封信好似有少少長。我知道你應該都唔好受，好快就要考文憑試，聽到咁負面既嘢，希望唔會影響你太多...因為除左你，我唔知同邊個講好，好想對住個海大聲咁樣叫，好似一個癲婆咁大叫。離開左一個城市之後，我只係去左另一個更討厭既城市。
 
Study Leave就快到，你記住答應左我唔可以偷懶嫁，一日玩一鋪LOL好啦。我會堅強，你都要答應我，你一定會堅強落去。我知道要自己留係香港面對各樣既壓力都唔係一件容易既事，但我相信你一定做到嫁。
 
你一定做到嫁。因為你係我黎心如見過最有理想同拚勁既人。
 
祝 生活愉快。


 
如
2013年2月27日
//