[高中][少甜]《如陽光伴我》: 三十三，尋陽冒險記（下）

「咁而家我要做啲咩？」我問。
「你望下上面！」她從酒店房走出走廊，穿着短袖T恤和短褲。因為走廊是半露天在戶外，她可以拿著電話對着我身處的馬路揮手。
 
「你小心啊。」我說。
「估唔到可以喺日本見到你，仲要跟蹤我去酒店，變態佬...」我從遠處看見她好像笑着說。
「一陣快啲返入房，日本真係好多變態佬。」
「我知道！！！所以而家我金睛火眼望住佢，肯定佢冇咁快行到上嚟！」她說。
 
「你個頭就變態。」我說。
「唔准話我個頭啊你！不知幾靚啊！」她大概是鼓起兩腮說。


「係唔差既。」
「嘻，我當你係讚我啦。」她笑著。
 
「你聽日有咩行程？」
「參觀博物館、圖書館、大學，遊學團都係咁嫁啦，成大班人做無聊活動，叫做可以洗下政府錢帶老師去旅行，同學柴娃娃咁玩，你估去日本係香港政府想你去咩，係就去左一帶一路啦，不過去呢到我都開心，最開心係有你，如果係烏兹別克，我諗我求你，你都唔肯去。」
 
「烏兹別克…好深奧。都係去日本好。」
「係啊，我班主任Miss Tang都喺到。計我話，去日本一定係佢既陰謀！根本就係想行藥妝店！」
「去到日本咁開心唔好講核突野。」我說。
「你唔好咁衰啦！」


 
「喂。」
「下？」她問。
「...雖然我靚仔、唔乞人憎...不過我好好㗎，同埋識講廣東話...總之唔好溝日本仔。」我說。
「嘻，好啦，既然你求我。」她笑得口不能合起來。
 
「咁聽晚我過嚟接你？」
「好啊，應該晚飯時間就可以走出嚟。同我同房係一個低年級女仔，佢應該唔會報串嘅！」
「你最好今晚同佢打好關係。如果唔係佢投訴你，要打比家長嘅話，激親嫲嫲。」我笑着說。
 


「嫲嫲點會嬲，佢會讚我叻女大個女！不過我驚學校報警咋。到時候你俾人刑事拘留就唔好啦！」
「關我咩事...」我說。
「拐帶未成年少女！」
 
「...咁過多年幾之後我先過嚟接你。」
「唔要呀。」
「聽晚八點左右接你啦。」我說。
「好野！聽晚見！」她笑着說。
 
「一陣見？」
「我話聽晚見啊！蠢！」她說。
「嗯，再見。」
 
「唔係再見啊，係早抖，每晚你都要講早抖！唔係就要罰食吉野家，一晚唔記得就加一餐。」
「…仲恐怖過中學時候訓導主任既懲罰…早抖。」我說。


「早抖蠢材！」然後她掛掉電話。
 
我向她揮手說再見，等看見她回到房間內，我才放心轉身離去。
 
在心如選擇離開之後，我就從來沒有真正的開心過，在我的世界，生存幾乎已經再無意義，每天也在捱，一天一天的捱下去。這幾年來，我遇過很多好好的人，但我近乎從來沒有和那些人建立過真正的連結，就好像我和世間上所有的人都堵上了一面石牆一樣。我避免與太多來至過去的人見面，一直逐點逐點的重新拾回自己破碎的板塊。好不容易康復過來，又會因為一些小事而想起那些往事而再碎掉。
 
晴不同，她為我帶來很多的轉變。就算有多難，我相信她都可以帶我走過，在她的世界，好像連黑白看起來是彩色。她就是永不放棄的想把我從黑暗中抽起來，就像以前充滿拚勁的那個我一樣。
 
這夜有點微雨，我獨自一人走在新宿街頭，燈影散亂的透過雨折射在黑夜的四週，這種冷雨夜的景色在我看來，竟有如晴空萬里。我不是村上筆下的男主角，現實並沒有羊男，我也不可能會找到。但我找到了晴。這一刻，我心中滿是她可愛的臉。