[高中][少甜]《如陽光伴我》: 三十四，抱著欣賞每顆星（下）

她的信說明了很多有關自己的事，有關她失落的來源，這是我始料不及的。

就算我沒辦法解決她的痛苦根源，我很想讓她知道，我會一直的守護著她，希望她一切安好。只要她願意，就算要長距離戀愛，就算要我想辦法搬去歐洲，我都在所不惜。我可以為她做任何事，只要她變得快樂就可以。即使心如來至一個沒有光的星球，我可以給她最大的亮度和熱度。

我決定要向她表明我的心意。

//
如：

收到你封信之後，我有衝動想即刻打比你。不過我諗，可能打左比你都唔知講咩好，我唔識講咩安慰既說話，好驚會講錯野，令你更加難受。作為朋友，我都好想可以喺呢段時間喺你身邊陪住你...不過我想你知道，就算唔喺同一個時區，我都係會無條件咁樣支持你。



我唔敢話自己可以明白你嘅感受。因為我根本無咩屋企人。我爸爸媽媽喺我未出世之前就嚟咗婚，我對父親嘅印象係零，同母親嘅關係亦都唔好。

但而家諗返起，可能都唔係一件壞事。我知道好難去脫離屋企人嘅陰影，不過真係好想好想話比你知，你喺我心目中係好好好好既一個女仔。就算你覺得自己幾差，屋企人覺得你幾差，喺我心目中你都係最好，無論點都唔可以改變呢個事實。

啊…我唔知應該要講咩好。所以惟有同你分享啲有趣嘢（或者得我覺得有趣）！邦個鹹濕仔每次去到屏山自修室，都話要坐喺指定中間，望住圖書館落地玻璃嘅位，佢話嗰度好多嘢睇喎。

嗰個位可以直接望入去圖書館，見到好多靚女坐喺長凳度睇書春光乍洩。根本佢就淨係想𥄫女，但係就死口唔認！佢話，呢個係生活嘅調劑、文憑試減壓良方。

都唔知個衰仔幾時先會正經啲！佢叫我唔好理佢，如果文憑試中文作文考試題目係《圖書館眾生相》既話，到時我就會後悔喎。



有人話自修室係溝女勝地，我覺得簡直係天方夜譚。每次去到自修室，感覺都好似上刑場咁，日日困住係個密室由晏晝12點去到夜晚10點，唯一可以抖下氣就係去廁所幾分鐘、或者食飯嗰一個鐘頭。

除此之外就只係不停咁樣做past paper，日做夜做，由05年CE做到上年DSE，練習卷模擬試卷，做到而家可以背書咁背，但係始終都係好冇安全感。不過我冇偷懶㗎！呢兩個月莫講話LOL，我連電腦都冇開過。

仲有就係…Last Day嗰一日，阿俊個傻仔居然企左喺到喊，好似生離死別咁，又話唔會再見，又話會好珍惜我地幾個，佢仲話估唔到中學生涯居然可以識到我呢個好大佬，我懷疑佢真係好鐘意比人話鬧同埋笑，先會咁鐘意同我地混埋一齊。

嗯，我諗，到你再回信俾我嘅時候，我已經考完DSE，到時你等我好消息啦。

好想快啲考完試！我會搵暑期工，努力儲錢。暑假後就可以去旅行，如果我去歐遊嘅話，你會接濟我架可？雖然你口中嘅英國唔係咁吸引，不過硬係有啲殖民地情意結。（仲有我鍾意嘅足球隊阿仙奴係喺倫敦㗎！）如果有機會嘅話，同你一齊搵個海邊大叫又點話，唔使多謝我，我會保守秘密。



希望你可以快啲無事，唔開心就喊出嚟，或者寫多啲信俾我，只要可以令你舒服嘅嘢，放膽去做啦！無論點我都會支持你。我知道未來一定會天晴。

其實...仲有一件事…

你仲記唔記得迪士尼個一晚，煙花既主題曲A whole new world啊？

我按原曲改寫左半首新既歌詞，係用首歌原本嘅歌詞改篇而成。呢啲歌詞全部係我好想同你講既野…希望你會明…

這段新的旅程 結伴分享這風景
你在天空 願否接受我 無限的愛情

這像詩的旅程 抱著欣賞每顆星
卸下艱辛共苦澀 為了凝望這眼睛



共我一起 讓你心驚奇拒絕乏味
沒法可撇低你 如那麼美
置身於似夢世紀

坐上魔毯 在半空穿雲似幻漸現
伴我重新開始 能再開始
目睹這美好 新的世界


我好清楚我只係想同你一齊，亦只係要同你一齊，
我地可以穿梭無垠無涯既銀河系，走遍每一個萬紫千紅好似萬花筒一樣既城市。

我知道呢個世界，有數百萬種可能，但係我既世界每一個可能內，我都必須要同你聯繫住。
因為我既整個靈魂都只可以留係你既身邊。我願意用我一生有限既時間，同你去換取無限可能既幸福。
因為所謂幸福都係為妳我而存在，就好似我係為你而存在一樣。



我會等你既答覆，係你答我之前，我會努力去完成DSE。我唔會令你失望，而家唔會，將來都唔會。

祝你 生活愉快

豪
2013年3月17日
//

我把信寄出。

大概直至現在的這刻，我也不知道這個決定是否正確，也不知道是否因為我這樣做，才會出現之後的那些事。

但我肯定那是我最想做的事。
由那刻直至現在都沒有改變過。



總要信，總要相信。

https://www.youtube.com/watch?v=atc8RAtl-Ms