是咁的，照顧過我嘅護士死咗: 四百零四、遍地開花

嗰晚，我地向醫生交代有咩事聯絡唔到十八子屋企人的話，就同我地聯絡。

我同媽媽、阿連三個一齊返愛民邨，我懷住沈重嘅心情回程，一路上都無講過野。

我個腦打哂結，根本無辦法有系統咁梳理思緒。

就算十八子醒返之後，真係話佢鍾意嘅係我又點？我無辦法回應佢嘅感情，因為我好清楚自己真心鍾意嗰個係林林。

返到愛民邨，阿連同我地分手返自己屋企，而我同媽媽就相對無言咁行返自己個井。





入到屋，地上放咗大大嘅警告牌，枱上係媽媽整嘅三人份飯菜，三餸一湯、三碗飯、三對筷子。

枱上嘅飯餸都失去應有嘅溫度。

我同媽媽一齊收拾飯枱，之後佢先沖涼，而我就開著電視睇直播新聞。

白色運動已經進入遍地開花嘅階段，香港九龍嘅主要道路好似彌敦道、遮打道同金鐘道，一眼望過去全部一片白色。

場面嘅震撼性令我一時忘記咗自己嘅煩惱，反正就算點煩都無用，倒不如著眼於自己做到嘅事仲好。





時間搭正四月二十八日凌晨零點零分，我拎出顏料繼續為我嘅警告牌上色。