是咁的，照顧過我嘅護士死咗: 四百零五、遺傳

媽媽沖完涼出嚟，扶住腰坐咗喺我旁邊，抬頭望住電視，光影喺佢面上閃爍，映照佢落寞嘅神情。

「我成世人都係為咗你而努力，依家再叫我去理解一班為成個香港嘅人努力嘅人，真係好難。」

我順住「骨」字嘅筆畫塗色。

「但見到十八子搞成咁，見到醫院依家咩情況，我相信出面依班人，最根本嘅願望，都係想香港變得更加好。」

媽媽拎起我一枝上色筆，沾上顏料，筆尖按壓喺未有顏色嘅「症」字上面。





「我都想香港好。」

媽媽嘅手臂好似流水咁優雅，柔和舞動，睇到我眼都突埋。

隻色⋯⋯上得好靚⋯⋯

「望咩？琴棋書畫我樣樣都識，係為咗你，先轉咗去學洗碗煮飯做家務架咋。」

我頓時感到鼻頭好酸。





媽媽揑一揑我個鼻：「唔知自己遺傳咗我啲藝術細胞呀呢？」

我索一索鼻水：「⋯⋯真係唔知⋯⋯」

「快手啲油啦，我地聽日一齊參加白色運動。」