是咁的，照顧過我嘅護士死咗: 四百零三、如能向月澄盡訴

一係就無女鍾意，一係就起雙飛，我真係想同過去嘅自己講頂住，依個世界其實好奇妙。

大雄、媽媽同阿連都企喺我嘅對立面，唯一可以反駁佢地講法嘅人依家仲喺隔離病房。

但事實上就算十八子話鍾意嗰個係大雄都好，大家都會認定佢愛嘅人係我。

「我諗⋯⋯我地無人有權估十八子嘅心意。」無論大多數外人講乜都好，我覺得依啲咁私人嘅感覺，只要唔係十八子親口承認的話，就唔值得相信。

「大雄，你就等十八子好返之後，先再親自再確定佢嘅心意，好無？」





大雄無答我，反而靜靜唱起幾句我最熟悉不過嘅歌詞：「唯獨我不甘心，我有愛卻說不得⋯⋯拾起畫筆， 再向過去潑點墨⋯⋯輪迴幾個夏與秋，再也不可忍受了⋯⋯前塵不再顧，如能向月澄盡訴⋯⋯」

只係歌詞同原本我所寫嘅有少少出入。

就只係一個人名嘅分別。

「點解⋯⋯你會識唱？」

「係澄澄嚟我屋企嘅時候唱，我諗⋯⋯啲詞係你改嘅，係咪？」





十八子煮飯洗碗嘅時候會唱，食飯嘅時候都會哼，大雄都係因為聽得太多次先會記得。

「⋯⋯係⋯⋯」

不過原本嘅歌詞係「向穎林盡訴」，但「穎林」同「月澄」嘅音調其實都一樣係三聲同四聲，所以即使改咗都係啱音。

「⋯⋯你⋯⋯明白未？」大雄靜靜咁問。

十八子係想⋯⋯我對佢唱依首歌⋯⋯





嗰晚佢陪我坐喺彩虹橋聽我唱依首歌向林林表白，但佢實際上⋯⋯希望我獻唱嘅對象係佢⋯⋯

「佢一直以嚟都搵緊自己真心鍾意嘅人，所以先會不停試咁多男仔。不過佢之所以搵唔到，係因為佢一開始就排除咗你依個答案。」

大雄兩隻手都放喺我膊頭上：「佢只係無察覺到自己對你嘅心意，但我察覺到。如果佢今次捱得過，佢一定會好清楚自己喺生死關頭徘徊嗰陣，個心係諗緊邊一個。」

我不知所措，因為我唔知應該點回應十八子嘅心意。

「所以⋯⋯唔使等澄澄醒，我都知我已經輸咗⋯⋯」