是咁的，照顧過我嘅護士死咗: 四百零二、佢愛嘅唔係我

「十八子係你新抱候選人，都要佢鍾意我先得架嘛，但佢鍾意嗰個係依個男仔，大雄吖嘛！」

「咁⋯⋯如果佢其實係鍾意你呢？」

咦？

內心好似被重錘敲咗一下咁。

我慢慢扭轉身體，望向低頭嘅大雄。





「⋯⋯你⋯⋯亂講乜野？」

「如果⋯⋯如果澄澄真正鍾意嘅人係你⋯⋯咁又點？」

大腦思維一時短路，唔知應該點反應。

「我先係以男朋友嘅身分同佢相處嘅人，但佢成日都將你掛喺嘴邊，每次講起你好似同另一個女仔有火花就會呷醋，生活上唔理發生咩事都會同你扯上關係，我地會分手，唔淨止係因為佢去照顧你一件事⋯⋯」

媽媽輕輕搭住我膊頭：「仔呀，人地都咁講，你信未？其實我地明眼人一睇就睇得出架喇。係你兩個自己唔知咋。就算係作為青梅竹馬，佢都做得太多喇。」





「其實我都覺得幾明顯。」阿連都加把口。

難以置信，而且我依家分唔清，到底係眾人皆醉我獨醒，定眾人皆醒我獨醉。

我一直都覺得十八子唔鍾意我，甚至中學嗰陣佢都已經拒絕過我，所以無再亂諗過我地之間嘅關係。

但媽媽同大雄根據十八子嘅行為去推測佢嘅心意，喺當事人失去話說權嘅依家，將佢地推論出嚟嘅真相講到似層層，搞到我失去咗判斷能力。

當所有人都話「係」嘅時候，原來作為少數嘅個體要肯定咁話「唔係」係好困難嘅事。





「咁⋯⋯你點解釋十八子對你認真嘅事？佢會為你喊，會同你拍多過一個月拖，依啲係佢真心鍾意你嘅表現，唔係咩？」

大雄失落咁搖頭，由佢聽到十八子入院就即刻撲過嚟，同埋依個失落嘅表情，我可以肯定佢係真心愛十八子。

「你知唔知佢點解會鍾意我？」

大雄好似唔想承認咁，咬住下唇：「佢話覺得我了解佢，好似明白佢嘅過去所以好體諒佢做嘅每個決定。但依啲⋯⋯其實都係我偷聽返嚟架咋⋯⋯由一開始，佢嘅過去就係同你分享，我只係咁啱喺你地後面，我只係你嘅替代品嚟⋯⋯」

大雄講到安全眼鏡內現出霧氣：「嗰日喺餐廳，佢望住嘅人係你，唔係坐喺你後面嘅我⋯⋯」

只係一張凳背之隔，已經係兩個世界。

「無論係佢嘅過去，定佢點解做護士，抑或佢屋企人嘅事，其實佢都無同我講過。」

大雄耷低頭，令人睇唔到佢嘅表情，但淨係聲線都聽得出佢嘅心痛。





「我會嚟睇澄澄，係因為我愛佢。但我唔會同佢復合，因為佢愛嘅唔係我呀。」