是咁的，照顧過我嘅護士死咗: 四百零一、新抱候選人

「澄澄佢點呀？」

「喺隔離病房。」

意味住再見返十八子的話只有兩個可能，一係就好返出嚟，一係就要等到佢死咗之後先有得見。

我地唔係直系家屬，就算十八子情況惡化到有生命危險，我地都無權入去睇佢。雖然醫院規則入面話醫生可以酌情處理，但喺法律上我地依班外人的確係無權睇佢。

不過直到依家，我都唔見十八子嘅父母出現。





由細到大，我都無見過十八子屋企人，甚至大學畢業佢地都無出席。

我向阿連同媽媽簡單咁介紹咗大雄嘅身分，媽媽一聽到佢係十八子男朋友當堂成個樣謝哂。

「係前男友⋯⋯」

媽媽又充滿希望。

「男朋友呀。」





媽媽又謝哂。

「但⋯⋯我地仲未復合架。」大雄自卑咁耷低頭。

媽媽又容光煥發。

「十八子一出返嚟你地就要復合。」

媽媽拉一拉我手臂：「仔呀，人地唔想復合咪由得佢囉。」





我揈開媽媽隻手，再捉住大雄膊頭用力搖佢。

「你同我聽住！你係十八子第一個拍多過一個月嘅男朋友，仲係佢第一個會喺手機名旁邊打心心嘅男朋友，亦係佢第一個話分咗手之後會眼濕濕嘅男朋友！我同佢由細玩到大，我知道佢幾時係認真，就好似當年佢話要做護士一樣，雖然個個都睇死佢，但佢一認真起嚟就會堅持到尾！既然十八子真心鍾意你，點解你要推開佢！」

大雄副安全眼鏡被我搖到差啲甩，佢即刻用雙手扶返正。

「我知道你因為佢上我屋企瞓同成日嚟照顧我先同佢嘈交分手，佢知道我失去咗鍾意嘅女仔搞到好傷心，所以先會咁盡力照顧我。就算上嚟瞓，我媽媽都喺度，你唔信可以問下佢我地有無亂嚟。」

媽媽一面事不關己咁話：「唓你兩個喺房我點知呀？」

「媽！你唔係幫緊手喎！」

「喂，佢係我新抱候選人嚟架喎，我就咁畀你將佢送返畀人呀？」

我學林林咁向媽媽反白眼，反到上宇宙。