是咁的，照顧過我嘅護士死咗: 三百九十九、蛻變
我同媽媽仲有阿連會合，十八子被送入爆滿嘅隔離病房，我地無得入去睇佢。
媽媽同阿連環視好似世界末日咁嘅醫院環境，兩個嘅心情都前所未有咁沈重。
我因為有病成日入醫院，先親眼睇到咁多荒謬嘅情況日日上演，佢兩個太少嚟醫院，今日嘅景象一定好震撼。
「你地明⋯⋯點解咁多人參加白色運動未？」
我諗就算係無腦嘅藍屍睇到咁嘅景象都會認知到香港醫療制度出咗好大問題，何況媽媽同阿連只係中立而唔了解實際問題，覺得依啲野唔關自己事嘅普通人。
當然，明白點解會有白色運動同會唔會參加又係另一回事。
「阿金，我知我平時把口好衰，但我今次係認真問，點解大家都唔滿意政府引入外援嘅方法呢？」
今日嘅阿連，終於有少程度嘅覺醒，由對社會現象未審先判，唔了解亦唔想了理問題，到唔去批評示威者，直到依家願意主動問關於依件事嘅問題。
想了解更多，想知道理由，阿連逐步嘅蛻變，我都一一看在眼內。
於是我就心平氣和咁向佢解釋政府方案嘅漏洞。