是咁的，照顧過我嘅護士死咗: 三百九十八、分頭行事

「我⋯⋯我唔想傳染畀你地⋯⋯我依家就去醫院。」

十八子講完，本來想推開阿連入𨋢，但佢伸出手嘅同時，成個人好似虛咗咁，向後跌。

我同阿連一齊拉住佢，十八子呼吸急促，全身發熱。

阿連即刻報警，但救護車服務繁忙，依家要去醫院都無車接送。

「媽！幫手！」我地幾個分工合作，阿連用手機不停搵有無的士同uber之類可以接送，媽媽就喺屋企拎咗幾個口罩同安全眼鏡畀我地戴。





「媽，阿連，你地送十八子入院先，我仲要搵一個人嚟。」

「好，啊，有車喇！落去啦我地！」阿連大叫一聲，就同媽媽扶住虛弱嘅十八子入𨋢。

而我亦返入屋，打開facebook將所有頭先發生嘅事一五一十講哂畀大雄聽，希望佢會嚟醫院見下十八子。

果然去到有生命危險嘅情況就會睇得出對方仲愛唔愛你，大雄秒讀之後就問我十八子喺邊間醫院。

我將地點話佢知之後就同佢約好喺醫院見面，至於病房之類嘅訊息我會去到先再通知佢。





通知完大雄之後，我即刻起行趕去醫院。