是咁的，照顧過我嘅護士死咗: 三百九十七、我……中咗

媽媽踢住拖鞋走出嚟：「開得飯喇你地仲走出嚟做乜呀？咦阿連？你又喺度嘅？」

十八子即刻擰開塊面，等媽媽見唔到佢下巴全部都係血。

「我落去幫老媽子買豉油之嘛。」

媽媽望住我地三個，顯然仲未搞清楚發生咩事，事實上我都未知十八子發生咩事。

「十八子？伯母煮好哂飯喇，乖，入嚟食飯先。」





十八子聽到依句呼喚，都無轉身，只係用力搖搖頭：「⋯⋯我⋯⋯我食唔到喇伯母⋯⋯」

媽媽聽到皺哂眉：「傻女嚟嘅，咩食唔到呀？發生咩事？入嚟先講啦。」

阿連同我都互相交換一個眼神，當中只有絕望。

十八子揈開阿連隻手，轉身對住我、阿連同媽媽。

口罩之下仲滴緊血，我順住鮮紅色嘅閃電沿頸向下望⋯⋯去到鎖骨。





十八子雙手抓住恤衫領口，左右一拉，展現衣物下嘅鎖骨同胸部。

「點⋯⋯點會咁架⋯⋯」阿連難以置信。

媽媽雙腳一軟，跌坐喺地上：「灰⋯⋯灰色⋯⋯」

瞳孔收縮，好似想排斥眼前嘅景象一樣。

十八子露出灰色嘅胸口，淚水不停被口罩過濾成血水，好似深紅嘅魔爪爬滿佢嘅頸同鎖骨，靜默無聲咁伸向心臟。





睇嚟係啱啱十八子去到我屋企門口，正要敲門之際打咗個乞痴，同時發現自己噴咗血水喺個口罩度，佢就即刻檢查自己胸口，發現灰色嘅同時我亦出嚟開門。於是佢先要逃走。

「⋯⋯我⋯⋯中左超級肺炎。」

今晚嘅晚飯，食唔成喇。