是咁的，照顧過我嘅護士死咗: 三百九十六、紅花

阿連聽到即刻大字形擋住𨋢門，十八子仲未死心，轉向想跑樓梯逃走。阿連反應極快，喺十八子起步嗰下已經捉住佢手腕。

「放手呀！」十八子不停掙扎。

我行到十八子面前，佢就故意耷低頭唔望我。

「阿金⋯⋯你兩個搞咩呀？」

「我點知呀？媽媽約咗佢上嚟食飯，唔知佢做乜嚟到門口都唔入嚟，仲愈叫愈走！」





十八子知自己走唔甩，終於放棄掙扎。

阿連嘅視線喺我同十八子之間游移。

我想托起佢塊面，但十八子用力轉開個頭：「唔好掂我！」戴住口罩嘅佢，明顯因為過度操勞搞到面色好差。

佢從來無試過對我咁惡，我亦壓低聲線，盡量溫柔咁問：「做咩事愈叫愈走？」

「⋯⋯⋯⋯你⋯⋯你畀我就咁走啦⋯⋯」





滴、滴滴。

「阿⋯⋯阿金⋯⋯」阿連指向同地表顏色格格不入嘅紅花。

眼淚喺十八子嘅眼角滲出，滑入口罩，但喺口罩下方滴出嚟嘅唔係淚水，係鮮紅色嘅血。

我伸出抖震嘅手，想揭開十八子嘅口罩。

佢用力揞住口罩，全身向後一退：「唔⋯⋯好⋯⋯」





媽媽踢住拖鞋走出嚟：「開得飯喇你地仲走出嚟做乜呀？咦阿連？你又喺度嘅？」

十八子即刻擰開塊面，等媽媽見唔到佢下巴全部都係血。

「我落去幫老媽子買豉油之嘛。」

媽媽望住我地三個，顯然仲未搞清楚發生咩事，事實上我都未知十八子發生咩事。

「十八子？伯母煮好哂飯喇，乖，入嚟食飯先。」

十八子聽到依句呼喚，都無轉身，只係用力搖搖頭：「⋯⋯我⋯⋯我食唔到喇伯母⋯⋯」