是咁的，照顧過我嘅護士死咗: 三百九十五、逃走

腳步聲沈重而疲憊，好似無力踏出每一步咁，直到停喺我屋企門外。

「乞痴！」

我本身以為會有敲門聲，點知出面個人打咗個乞痴之後就靜咗落嚟。

「仔呀，十八子係咪到咗呀？」媽媽喺廚房嗌出嚟。

「係啊，我依家去開門喇。」我放低畫筆行去門口，同時我聽到外面嘅腳步聲再次響起，對方急急腳邁步離開。





咩事？點解要走？

我即刻打開門，只見走廊上有一個女性背影漸漸遠去。

「十八子！」

背影聽到我嘅叫喊，即刻加速逃走。不詳預感又再爬上心頭，好似被千萬隻螞蟻咬緊個心咁。

「十八子！咪走住呀！」





佢再加快腳步，衝去電梯口㩒𨋢，好似我係嚟追殺佢嘅殺人狂咁款。當我追到出去，啱啱好𨋢到，十八子正想衝入去。

「李月澄！同我企喺度！」

聽到我叫佢全名，十八子猶豫咗一秒，同時一個人影走出𨋢，係著住背心、孖煙通、人字拖嘅阿連。

「哇搞咩呀？」

十八子回神，想衝入𨋢，我即刻大叫：「阿連擋住佢！」