是咁的，照顧過我嘅護士死咗: 三百九十四、晚餐

我幾乎唔敢相信我隻耳仔，連反應都畀唔到。

「⋯⋯呃？」

「反正我留喺屋企都無野做，我又唔放心你自己一個去示威，咁解決方法都係得依個啫。」

「即係⋯⋯你真心支持我咁做？」

「本來就支持你咁做，我反對係因為你容易受傷，太擔心你去到會被人撞散先唔想你去之嘛。」





我望住洗菜嘅媽媽，深刻咁明白到咩叫世上只有媽媽好。

「我被人撞散咗仲有十八子同阿連照顧你架嘛。」

「你把死人口係咪要咁衰呀？」

「唔係唔係～我又有警告牌又有你做我守護神，一定唔會有事啦。」

媽媽話我正衰仔，但又忍唔住陰陰嘴笑，準備煮飯。





「咁我去油埋塊牌先喇。」

「去啦去啦，你喺廳整啦，費事一陣聽唔到十八子敲門呀。」

十八子放工過嚟我屋企最快二十分鐘就到，媽媽計好哂時間，等佢一上到嚟就可以開飯。

雖然為咗等十八子要九點幾先食晚餐，但我地從來都唔介意。

我拎咗未完成嘅警告牌喺廳度繼續上色。每當我開始畫畫同油顏色，時間就會過得好快，就算半粒鐘都好似彈指一瞬咁。





聽人講快樂嘅時間總係過得特別快，所以我慶幸自己每次拎起畫筆都會覺得時間唔夠用。

大概過咗半個鐘頭，我啱啱好將個「脆」字填完鮮紅色，屋外就傳入有人行近嘅聲音。