是咁的，照顧過我嘅護士死咗: 三百九十三、我陪你一齊去示威

至於大雄單野，我喺十八子facebook嘅朋友名單度搵到佢。依三日每隔幾個鐘就傳訊息畀佢，條友開頭睇完會封鎖我，我就開咗幾十個分身繼續搵佢，依家佢無再封鎖我，但就睇咗唔覆機。

喺佢嘅角度睇，一定覺得我同十八子有路，而我就不停向佢解釋我地兩個只係青梅竹馬嘅關係。

當十八子保護我，為我出頭嘅時候，我就當佢係姐姐咁。但當佢唔開心，需要人陪嘅時候，我又會當佢係妹妹。無論邊一樣，我都只係當十八子係家人，而唔係戀愛對象。

始終我愛嘅女人，都係林林。

我唔知仲要解釋幾耐大雄先會相信，但我會繼續搵佢。





依個時候，電腦彈出十八子搵我嘅通知，係佢話想畀我聽嘅歌。

米津玄師嘅《Lemon》。

「終於有得休息！伯母叫我上嚟食飯喎！」

「上來吧，我在家等你。」

啱啱媽媽仍然未真正支持我去示威，我諗今晚食飯，當佢聽埋十八子點解堅持返工嘅理由，佢大概就會明白我點諗。





希望今晚可以打動到媽媽，等佢真心願意畀我出去。

我將解釋嘅千字文傳畀大雄之後，就去幫媽媽手準備晚餐嘅材料。好多間公司都暫停運作，所以媽媽被逼無野做，要留喺屋企。

「你真係要去？」

媽媽將洋蔥切粒，砧板上發出格格格格嘅聲音，果然係何文田快刀手。

「你問幾多次都無用，我已經決定咗。」





格。

切洋蔥粒嘅手停止動作。

媽媽深呼吸左一口氣，冷靜又堅定咁講：「既然係咁，我陪你一齊去示威。」