是咁的，照顧過我嘅護士死咗: 三百九十一、公憤
結果我失敗回程，同時發現啲商場同超級巿場霎時間多咗好多人，而且爭先恐後，搶購潮正式開始。
阿連部手機瘋狂震動，我拎出嚟一睇，大堆新聞嘅即時消息彈哂出嚟，喺預覽見到全部都係講超級肺炎。
終於到達臨界點，就算新聞唔報都已經好多巿民知發生緊咩事，去到傳媒唔報唔得嘅地步。
雖然之前已經喺早洩同連狗討論區有大量懶人包，連wtsapp之類嘅通訊軟體都有傳過相關資訊，但政府發言人就話有人故意煽動群眾恐慌情緒，仲未接獲確診超級肺炎嘅個案，叫巿民唔好被流言影響引致恐慌。
不認不認還需認，依個世界嘅問題唔係大家都唔講就等於唔存在。
超級肺炎浮上水面後被全港科研組織馬不停蹄咁研究，搵出病毒嘅特性同時希望搵到更有效嘅治療方法。
原來超級肺炎嘅病毒只會喺病人胸口開始變色嗰陣先會傳染畀人，而戴口罩有效阻隔八成嘅病毒，但要慎防飛沫入眼就可以擋埋嗰兩成，所以全港嘅眼罩同實驗用嘅安全眼鏡都全部被人掃哂貨。
無幾耐網上就瘋傳一張政府對傳媒高層落封鎖令嘅對話圖，頓時引起公憤。