是咁的，照顧過我嘅護士死咗: 三百九十、收到薯片！

「戴口罩多啲洗手萬事小心唔好瀨野吖嘛，得啦！」

「唔係。而係應承我，要同大雄復合。」

十八子被我突然嘅跳脫要求嚇一嚇，佢望向地下，右手捉住左臂：「事到如今仲講咩復合吖⋯⋯」

我抬高佢塊面，果然係眼濕濕，同頭先講起大雄嘅時候一樣。

「今次係第一次，你講起分手嘅男朋友會眼濕濕。識你咁耐，你以為我會睇唔出你係咪認真咩？」我嘅手指擦走佢嘅淚水：「我知道愛一個人但無得相愛有幾痛苦，我唔想你都好似我咁。」





十八子下唇用力頂住上唇，好明顯係忍住唔喊，但淚珠仍然大大滴咁湧出嚟。

「⋯⋯佢⋯⋯佢肯同我復合先算⋯⋯」

「放心交畀我啦。到時你咩都唔好理，總之同佢復合就得。你肯答應我，我就畀你留喺度打仗。」

十八子好似聽到爸爸氹佢會去主題樂園嘅小妹妹咁，含住泡眼淚扁嘴咁點頭。

「⋯⋯睇嚟⋯⋯你心情已經無之前咁差。起碼有返啲幹勁。」





「因為我搵到要為林林同為你做嘅事。」

十八子欣慰咁笑一笑：「咁就好喇。我一直有首歌想你聽，雖然係好慘，但悲傷到盡頭會有少少希望同溫暖嘅歌。之前怕你未振作，點解釋你都淨係聽到慘嗰部分，不過依家應該唔使擔心喇。」

「好，你搵畀我。」

「無問題。咁我做野先喇。」

「萬事小心。」





佢向我敬軍人禮：「收到薯片！」