是咁的，照顧過我嘅護士死咗: 三百七十、四萬三千二百次

離開醫院後，我獨自一個坐喺家樂坊旁邊嘅小公園。

附近有啲阿伯阿叔，但無人過嚟坐我旁邊。或者係因為我左右手都有包紮，又或者因為我個樣同喪屍一模一樣。

我望住人來人往嘅旺角，由日光照射大街坐到街燈一盞盞著起。

馬路嘅燈號由紅色轉為綠色，綠公仔閃閃下，又變返紅公仔，週而復始、循環不息。

的、的、的、的、的、的的的的的的的的的、的的的的的、的的的的的、的、的、的⋯⋯





呼吸同心跳都減慢落嚟，眼前嘅人群、車輛之上運連嘅時間好似比我快好多咁，掠過眼前嘅時候留低殘影。

紅橙色嘅車尾燈喺路上拉出彎曲嘅尾巴，路人行過嘅時候會拖出長長嘅鬼影。

我頓時察覺到，我甩骹嘅左手同斷開嘅右手腕已經唔識痛。

全身嘅痛楚好似江河匯聚咁湧入同一個地方。

心口好痛，心臟每一下收縮同放鬆都好痛。好似全身上下所有痛覺神經都集中喺心臟，一秒一下，一秒一下，每秒都痛過全身骨折。





喺一分鐘內，我嘅骨頭全部碎裂咗六十次。

由朝早到夜晚，我呆坐咗十二個鐘頭，全身嘅骨頭碎裂咗四萬三千二百次。

又過一秒，四萬三千二百零一次。

原來依個世界上，死亡並唔可怕，因為人類充其量只會死一次。

原來最可怕嘅唔係死，係聽到心愛嘅人死，而你仲未同佢講，我鍾意你。