是咁的，照顧過我嘅護士死咗: 三百七十一、係我嘅錯
我終於鼓起勇氣勉強用手機上網睇新聞，係時候接受現實。
有啲野唔係睇唔到就代表可以否定。
但我就天真到覺得一日未睇新聞，就代表依個世界仲未承認林林死咗嘅事實。
打開手機，社交媒體又好，新聞網又好，都充斥住「美女護士猝死」嘅新聞。話推斷係今晨大約十二點半左右死亡，亦即係我同佢分開無耐之後。
我好唔忿氣，好憎自己，但我左右手都無力握實拳頭。
如果⋯⋯如果我早啲向林林表白，就有一半機會做到佢男朋友，咁我就可以名正言順陪佢一晚⋯⋯林林一有事就送佢去醫院，咁佢就唔使死⋯⋯
係我嘅錯⋯⋯我早啲表白的話，就有五成機會救得返林林⋯⋯
垃圾。
廢物。