是咁的，照顧過我嘅護士死咗: 三百六十三、心口痛楚

講完之後，林林就轉身用鎖匙開鐵閘。

熱血喺我全身流轉，我咁大個仔除咗媽媽之外就無其他異性摟過我，今次仲要係我心上人，到底發生咩事？我仲未理解到。

我啱啱明明打算摟住佢，依家我直情想摟實佢再表白。

冷靜！冷靜呀魏牘金！

就算係朋友都會摟架啦，無咩大不了！





林林打開門，回眸一笑：「拜拜。」

我忍唔住喇！我要表白！依家即刻馬上！

「林⋯⋯」

正當我想開聲嗰陣，林林揞住心口，腳下一軟。

我即刻扶住佢。





「林林！你⋯⋯做咩事？」

林林額上嘅汗水大大粒咁滑過側面，佢嘅表情因為痛苦而扭曲。

「心口⋯⋯有啲痛⋯⋯」

咩摟住人咩表白依啲念頭都一一化灰，見到林林咁嘅樣我除咗擔心之外個腦就乜都無。

「你見點呀？」





「無事⋯⋯我諗我休息下就得。」

「使唔使去醫院？心痛可大可小架。」

林林揮手搖頭：「唔使⋯⋯我諗我今晚唔溫書喇，直接瞓覺，瞓完無事架喇⋯⋯」

我好疑惑，亦好擔心。

「放心，我自己係護士知道自己身體點樣嘅。依排休息唔夠啫。」

「一係⋯⋯我我我我我我我陪你吖？」

林林失聲笑出嚟：「噗！咁快想入我屋企？」