是咁的，照顧過我嘅護士死咗: 三百六十二、林林生日

同時，林林轉身向我，我亦即刻剎制。

「夠鐘喇。」

本身想摟住佢嘅衝動，因為佢依句突如其來又莫名其妙嘅說話窒一窒，再次被理性制服。

林林向我展示手機，上面寫住零零零零，十二點正。

「今日我生日呀。」





「啊⋯⋯哦！」

我頓時明白點解林林開始講自己嘅過去之前會望一望手機話未夠鐘，甚至明白點解佢會特登同我講佢嘅故事。

原來係想等到十二點正。

「生，生日快樂！」

林林展露一個天真無邪嘅笑容。





「嗱，你頭先應承咗今日會送生日禮物畀我架，唔準反口。」

「得！我一瞓醒就去醫院搵你！」

「仲要請我食飯。」

「仲要請你食生日蛋糕！」

林林嘅笑容甜到好似蜜糖咁，我個心已經融哂。





「咦？」

發生咩事？

身體好暖。

林林嘅體溫傳咗過嚟我嘅皮膚，暖意由每個毛孔滲入皮層，湧上心頭。

林林⋯⋯摟住咗我⋯⋯

「多謝你呀，阿金。」