是咁的，照顧過我嘅護士死咗: 三百六十四、分隔

我即刻諗到啱啱我句野有咩唔妥，雖然我心入面只係諗住陪佢等佢有咩事可以幫手，但咁就代表我會入佢屋企同佢過夜。

我同林林當然唔係可以過夜嘅關係。

「我我我我我我我唔係咁嘅意思呀⋯⋯」

「嘿嘿，你咁樣好得意。唔講喇，我入去喇，一陣醫院見啦。」

林林喺我懷中離開，跨入自己屋企，拉埋鐵閘。





「林林。」

臨閂埋木門之前，我叫咗佢一聲。

「嗯？」

「生日快樂。」

「多謝。早唞喇。」





「早唞。」

門邊慢慢推進，將室內嘅光景壓縮。林林嘅身體，到半身，到半邊面，到眼神。

咔嚓。

聽到木後嘅林林著上拖鞋遠去。

木門將我同林林分隔，永遠分隔。