是咁的，照顧過我嘅護士死咗: 三百五十四、我想做護士

「我地人就得咁多，病人就源源不絕咁湧入嚟。你係我，一個有手有腳嘅叫你斟水，另一個下半身唔郁得要放尿，手得一對，人得一個，你會幫邊個？」

喺人力不足嘅環境之下，幫一個人，就代表幫唔到另一個人。

拯救一個人，就代表無辦法拯救另外一個。

「除非醫院增加人手，多啲人入行，體制有改革，如果唔係過多幾年真係會爆煲。唔好話過多幾年，依家再嚟多次沙士我地都死梗。」

林林沈默一陣。





「我做野先喇。嫲嫲今日幾精神，你同佢傾下計啦，唔阻你地。」

「姑娘！」正當姑娘要行嘅時候，林林叫停咗佢。

「唔？」

「係咪如果多一個護士，就可以幫多一個病人呀？」

姑娘點點頭：「唔止一個，我地一對十架嘛，起碼幫多十個病人啦。」





林林望向張開眼，對住自己微笑嘅嫲嫲，深深吸咗口氣。

「我想做護士。」