是咁的，照顧過我嘅護士死咗: 三百五十三、醫院荒謬事
林林喺嗰四個月入面，親眼睇到好多荒謬事，而且佢係唔明點解會咁，於是成日趁護士姐姐同嫲嫲檢查嗰陣問下係咩事。
比如見人投訴，話醫院做咩畀橙做飯後果，病人無力摵橙皮點食，又話醫院啲餐具唔衛生，又話啲椰菜點解唔可以轉菜心生菜，又話護士唔幫手斟水依樣嗰樣。
「有啲病人之前住開私院，一間病房先得幾張床，空間又多，病人又少，護士工作量自然細，同埋佢地叫入院嘅人係cilent即係客人。自然咩要求都會盡量滿足佢地。」
林林留意到，醫生護士往往都比較願意去幫禮貌好嘅病人同解答家屬嘅問題。
而林林喺嫲嫲面前一向都係乖乖女，唔該前唔該後，所以啲護士都對佢好好。
「不過我地公立醫院係叫入院嘅人做patient即係病人，我地係幫佢地做基本護理為主。仲有你都有眼見啦，我地一對十幾個，評估過病人係有基本自理能力的話，我地一定係照顧咗比較嚴重嘅病人先。」
嗰時嘅醫院情況都未至於今日咁差，但問題已經醞釀緊，只係當時仲算頂得順。
而今時今日，大部分醫護人員都已經頂唔順。
不過就算係當年嘅醫院，都已經幾乎爆滿，只係差在未喺走廊加床咁解。