是咁的，照顧過我嘅護士死咗: 三百五十、不停重複

之後醫生講乜林林已經聽唔入耳。

佢淨係記得自己伏喺病床邊，眼腫腫咁等嫲嫲起身。

「嫲嫲⋯⋯對唔住⋯⋯」

「林林⋯⋯唔好吸毒呀⋯⋯」起身嘅第一句，就係叮囑孫女唔好做啲對自己有害，而且返唔到轉頭嘅事。

「我知⋯⋯我知⋯⋯我唔會架喇⋯⋯我知錯喇⋯⋯你快啲好返好無呀⋯⋯」





嫲嫲摸下自己個鼻。

「應該⋯⋯唔得喇。嫲嫲自己知自己事。」

眼淚好似可以無止境咁湧出嚟。

「係我錯⋯⋯係我搞到你咁架⋯⋯」

「傻妹⋯⋯嫲嫲自己身體唔好⋯⋯咳咳！唔關你事。」





「明明就係因為我食煙先會搞成咁！」

嫲嫲伸出手，有皺紋，亦因為長年累月嘅粗重工作令手心起哂枕，皮膚非常粗糙，摸到面上會有少少刮。

「林林⋯⋯唔好吸毒呀⋯⋯」

嫲嫲嘅願望只有一個，不停不停重複。

林林好用力點頭：「我應承你唔會吸⋯⋯我會戒煙戒酒⋯⋯我唔會架喇⋯⋯我會乖架喇，你好返好無？」





嫲嫲知道孫女唔會吸毒，終於安心咁微笑。