是咁的，照顧過我嘅護士死咗: 三百四十九、鼻咽癌

嫲嫲經過急救之後，好彩無生命危險。

「邊位係病人家屬？」

「我，我係呀。佢係我嫲嫲。」林林焦急咁行近醫生。

林林過去，醫生索一索鼻，微微皺眉。

「小姐你食煙架？」





「啊⋯⋯係呀。」

「你嫲嫲確診有末期鼻咽癌，我建議你為病人著想，唔好再食煙喇。」

林林從來無諗過，人嘅語言原來可以好似重錘咁將靈魂撞出體外。

頓時間，成間醫院好似靜哂，耳鳴取代世界嘅聲音。

「無⋯⋯無理由架⋯⋯」





其實當日，嫲嫲之所以會提早返屋企，係因為返返下工咳血，先會請假休息。

「醫⋯⋯醫生你係咪驗錯呀？我嫲嫲一路都好健康架喎⋯⋯」

林林係有見過佢咳幾聲，但應該未至於咁嚴重架？

「老人家嘅身體狀況通常都係短時間內轉差嘅。而且你又有食煙，唔會有錯。」醫生好認真咁講。

「我已經無喺佢面前食，我有見過佢咳架！我無喺佢面前食架！我就算喺屋企食，食完都有開抽氣扇抽返啲煙出去架！」





大家姐捉住激動嘅林林。

「就算有開抽氣扇，室內都會殘留二手煙。另外仲有你嘅衫褲鞋襪，屋企嘅家具等等都會殘留三手煙。一日半日當然唔緊要，但長期吸入就會好傷呼吸系統嘅器官。」