是咁的，照顧過我嘅護士死咗: 三百五十一、冰壺

林林返到屋企，就將衣櫃入面嘅煙，雪櫃嘅酒全部丟哂。

但係佢無丟到大家姐送畀佢嘅冰壼，當係一個提醒，因為每次見到冰壼就會諗起嫲嫲嬲到吐血嗰日嘅情景，只要諗起就無可能再受到咩誘惑。

嗰一年林林中五，由嫲嫲入院開始直到佢離開，大約四個月時間入面，林林成日逃學返兼職，同埋喺醫院照顧嫲嫲。

林林為咗唔好冧班，久唔久都會返學保持最低出席率。

佢諗住盡快考完個會考就去返工，咁就可以賺多啲錢，等嫲嫲可以試貴啲嘅藥。





睇住嫲嫲化療之下日漸消瘦嘅面容同一撮一撮甩落嚟嘅頭髮，聽住嫲嫲借插喉呼吸嘅扯哮聲，壓力同負面情緒又再籠罩林林嘅內心。

好想⋯⋯食煙飲酒⋯⋯

每日返到屋企就得返自己一個，又再得返自己一個。

好攰，好想上吓電鬆一鬆。

直到望向電視櫃上嘅冰壼。





嫲嫲吐血嘅畫面佔據視線。

林林用力揞住雙眼，但淚水依舊喺手指間一滴一滴咁滲出嚟。