是咁的，照顧過我嘅護士死咗: 三百四十、報應

佢好想欺凌其他人嘅時候可以由心而發咁大笑出嚟，但佢其實笑唔出。

唔可以被班姐妹發現自己無笑，因為一旦唔笑，就係異類。

如果被人問到自己點解唔笑，就要承認自己同大家唔同，無辦法透過欺凌其他人而覺得開心。

同大家有差別的話，下場只有一個。

林林比任何人都清楚下場係乜，因為一開始佢會被人欺凌同排斥，都係因為差別。





香港人同大陸人嘅差別。

唔可以被班姐妹知，佢地嘅「內側」唔同，所以只能夠偽裝「外側」，令大家唔會發現相異之處。

由嗰日開始，佢每日都戴住面具返學，自己匿埋喺面具之後，假裝行兇嘅人唔係自己。

咁就可以⋯⋯一直留喺依個大家庭。

「一個人如果唔知自己有問題，都仲算情有可原。但知道自己有問題都當唔知，仲唔停手，就會有報應。」





林林話，佢嘅報應之一，係食煙同飲酒可以帶嚟嘅快感已經無限度接近零。其實再食再飲都無幾多快感可言，但已經上咗癮，只係食開就食埋落去咁解。

「你知唔知，所謂報應，最痛嗰種，永遠都係報喺你最重視嘅人身上。因為咁，我地先知咩係痛。」

林林最重視嘅人，就係佢嫲嫲。