是咁的，照顧過我嘅護士死咗: 三百三十九、歡笑面具

中五嗰年，林林嘅大腦已經習慣咗快感嘅刺激，於是食嘅煙、飲嘅酒都愈嚟愈哽，份量愈嚟愈多。

而佢亦漸漸發現，自己其實根本唔鍾意同大家姐佢地喺埋一齊。

「嗰一日我記得好清楚，我地幾個女仔喺廁所將一個女同學個頭塞落屙完尿嘅馬桶入面。大家姐同其他人好似都好享受成個過程咁，由心而發咁大聲笑出嚟。但我當時笑唔出。」

不過林林唔可以唔笑，因為喺學校，大家姐嘅團體係佢唯一嘅歸宿。如果依個地方都無埋，佢就又會得返一個人。

「我唔想再得返一個人⋯⋯我唔想再孤單⋯⋯於是⋯⋯」





林林試過突然得返自己一個嘅滋味，好清楚身邊一個人都無嘅無助，而且成個小學都無朋友，佢唔想喺中學難得識到嘅好姐妹都離佢而去。

「林林，到你嚟！」

如果仲想留喺依個大家庭，就唯有做埋一份。

一切都係因為唔想失去喺學校唯一接受佢嘅群體。

唔想又得返自己一個人。





於是佢掛起歡笑嘅面具，由大家姐手中接力，將女同學個頭挫落馬桶。