是咁的，照顧過我嘅護士死咗: 三百三十六、欺凌理由

林林被同學欺凌嘅理由多到數都數唔哂。

唔識講廣東話係其一，生得靚女唔再講，著嘅校服殘舊發黃，用嘅文具無一樣係新，無零用錢，比其他人早發育，個胸生得大，多男仔鍾意⋯⋯

整個小學時期，林林都好畀心機學好廣東話，因為只要講到相同嘅語言就可以少一個被人蝦嘅理由。

但到學識，又被人話有口音，於是佢就落力去糾正自己嘅發音。

係人都知廣東話難學，而林林苦練後嘅咬字同讀音，比一個本地香港人更加準確。





自己學識洗乾淨件校服，返學用布紮住個胸⋯⋯總之喺能力範圍內，盡量減少自己被欺凌嘅理由。

咁多個理由入面，林林最討厭就係「大陸落嚟」，因為無得改變，同時亦被人話得最多。

林林唔想人知道佢大陸人嘅身分，但已經太遲，當時讀緊初中嘅佢，真正身分已經被全級同學知道哂。

超級英雄就算被揭露真身都會得到外人嘅喝采。

但林林唔係超級英雄，一旦身分暴露就會成為眾矢之的，永無翻身之日。





「又唔係我想先落嚟嘅！依啲咁嘅地方，你估我好想嚟呀？」

「咁你咪躝返上大陸囉大陸雞！」