是咁的，照顧過我嘅護士死咗: 三百三十七、染黑

每次有咩爭執，林林就出手打人，好似打大籮咁失哂控，無人㩒住就一定打到對面重傷。

於是被人標籤成不良少女，無論識唔識佢嘅人都對佢無好感。

「喂，柳穎林下話？聽講你好好打喎。」

大概係初中嘅時候，林林就識咗大家姐。

「你以後跟我，就無人夠膽蝦你架喇。我地依度唔會理你係咩人，總之打得就係一家人，就係好姐妹！」





人生第一次被人接納，林林已經唔理群埋一班不良少女身邊會令佢變成點。

雖然嫲嫲講過近朱者赤，近墨者黑，唔好群埋啲壞人度。但只有墨者願意同佢一齊玩，只有壞學生先肯接納佢。

既然係咁，染黑又有咩所謂？

林林由嗰陣開始學識食煙同飲酒，因為大家姐話依兩樣野，食咗同飲咗之後啲煩惱都會少咗好多，個人會開心啲，無咁大壓力。

以尼古丁同酒精麻醉自己嘅大腦，尋求短暫而虛無縹緲嘅快感，慢慢成癮，想一直沈醉於輕鬆同血脈賁張嘅狀態入面，希望煙同酒嘅效力永遠持續落去。





大家姐帶領嘅四五個姐妹，連同林林在內喺學校搞惡作劇、打老師、上堂搗亂、破壞公物、講粗口、食煙、飲酒、欺凌其他同學，無惡不作。

「當時我無發覺，但其實唔知幾時開始，其他同學唔鍾意我嘅理由已經唔係因為我喺大陸落嚟。佢地對我嘅疏遠、敵意同喺背後講壞話，係因為我嘅行為乞人憎。」

但嗰陣嘅林林仍然認為，自己會犯眾憎係因為佢係個大陸人。所謂當局者迷就係咁解。