是咁的，照顧過我嘅護士死咗: 三百三十一、慘白倒影

我嘅心跳因為林林嘅表情行為同說話瘋狂加速，依家咁睇起嚟佢唔通真係對我有意思？

咁我真係表白的話，可能真係會唔使再同五姑娘共渡餘生喎。

會唔會呢？有無可能呢？唔知點解我好似覺得今次表白有機會成功。

或者我又係毒撚自作多情，但我⋯⋯我真係好想知個答案。

「林⋯⋯」





我本身真係有衝動即刻表白，但見林林已經挨住我膊頭瞓著咗，我唔忍心叫醒佢。

於是嗰陣衝動就慢慢淡出咗。

我喺對面嘅玻璃窗上見到我同林林嘅鏡像。

窗上面，林林伏喺我膊頭瞓著咗。倒影之中，我地兩個就好似情侶一樣。

我雖然心甜，但亦夾雜咗心痛。





因為林林嘅倒影，膚色之慘白，如同一個就死嘅病人。