是咁的，照顧過我嘅護士死咗: 三百三十二、話醒就醒

佢聽朝返早更，七點，但聽講今晚會溫書溫到兩三點先瞓。

如果可以，我都想為佢分擔一半工作量。不過我知道就算係分擔一成我都會頂唔順，好難想像佢一路以嚟係點捱過每一日。

就到站前，林林嘅手機響起，嘈醒咗佢。

「喂⋯⋯嗯⋯⋯拎咗喇，你得閒就嚟攞返啦⋯⋯嗯⋯⋯拜拜。」

林林掛斷手機，又繼續瞓。





「就到喇。」

「唔⋯⋯畀我瞓多陣⋯⋯」林林好似懶床嘅小學生咁，仲攬住我右手，面珠登喺我膊頭磨咗兩下，好似貓咁。

「下一站石硤尾，左邊嘅車門將會打開。」

林林聽到「石硤尾」三隻字，即刻擘大眼，頭先個眼瞓樣好似從來無存在過咁。

「哇，你真係話醒就醒。」





「無辦法，慣咗。行啦我地。」

列車埋站，我同林林一齊落車。