是咁的，照顧過我嘅護士死咗: 三百二十七、接納

之後黃醫生又繼續講：「講得難聽啲，如果我真係被人炒，最多咪去開間診所仔幫人睇傷風咳，餓唔死嘅。我有得依條後路，就有責任去講普通打工仔唔敢講嘅嘢。比起一啲後生仔要坐監、停學、斷送前途，我呢啲中產嘅所謂犧牲，又算得係乜？」

醫院內部有人撐佢為同行發聲，亦有好多人叫佢唔好搞咁多野。

「搞社運係咁架喇，就算係企出嚟講一個人人都知好大問題嘅問題，都係會有人鬧，依樣都係要背負嘅代價。」

黃醫生一概懶理，我行我素。

「諗返林護士係以死控訴，我都只係企出嚟示威，最多被人喺背後或兜口兜面鬧啫。但同佢相比起嚟，我要承受嘅都輕太多喇。。」





講起德仔，我地三個都忍唔住面色一沉。

我望向林林，盡快扯開話題：「咁你⋯⋯點睇大陸班新移民？」

我留意到林林微微側開頭，明顯唔想討論依個話題。

諗返起嚟，之前佢所表達出嚟嘅價值觀，無分香港人同大陸人，大家都係病人，其實某程度上都反映咗林林自身嘅願望。

要人地接納你，你就先要接納人。





林林心入面，一定都係希望緊有人願意接納佢嘅身分。