是咁的，照顧過我嘅護士死咗: 三百二十五、最有心
「啲病人已經好慘，走咗佢地咪仲淒涼。走下一個走下一個，就真係無人睇佢地架喇。做醫生嘅點會想見到病人吽到死？其實當你見到病人慢慢好返，過返正常生活，嗰種滿足感係再多錢都比唔上。回歸讀醫嘅初心，都係想幫人啫。」
我點點頭，我相信好多醫護人員嘅初心都係救人，唔係巿儈咁貪嗰啲人工。
有好多人工唔高嘅EN一樣咁盡心盡力照顧病人。
「做醫生唔係想像中咁有錢，我買樓都好困難，都係靠父幹，層樓首期阿爸畀。我成日同人講，要發達唔好做醫生，快啲轉行喇。」
黃醫生無力咁一笑：「明明網上大家都討論過，喺香港你賺皮幾定幾皮一個月，其實生活都無分別。因為都係買唔起樓。但唔知幾時開始個個都以為我地一百幾廿萬未開頭。我去做股票經紀仲高人工，仲舒服，仲要唔使畀人鬧。我地呢？人工唔夠佢地一日開一張單，辛苦到嘔屎，仲要被人鬧我地搞搞震，人工包，咁唔滿意唔好做，咩世界。事實上都真係好多人轉咗行喇。」
黃醫生即刻戴頭盔向我灑手擰頭：「我唔係話走咗啲同事自私，但我可以好肯定講，繼續留喺醫管局嘅都係最有心嘅同事。」