是咁的，照顧過我嘅護士死咗: 三百二十四、但你仲做緊
沙士爆發嗰年，黃醫生已經係醫科實習生，親眼見證過醫護界最艱難嘅歲月。
「當時係成個香港都頹哂，個個醫護人員嘅士氣都好差，但點都好過今日嘅情況。所以我先會企出嚟。」
為咗令我可以喺面對阿連嘅偉論嗰陣有得反駁，我就繼續問黃醫生：「係咩驅使你企出嚟？你知啦好多人話你地嫌辛苦架嘛。」
「入得行預咗辛苦架喇。企出嚟發聲係因為見到制度唔公平。啲阿公阿婆心臟病要通波仔都畀唔起錢，政府又畀唔起錢、或者唔肯畀錢醫。寧願拎六千億去起人工島，幾億起個噴水池。我地今日唔出聲，禍及嘅係之後幾世嘅老老少少。」
「你點睇走咗嗰班人呢？」
黃醫生重重咁嘆咗口氣：「作為醫護人員每日見咁多唔公義嘅事發生，係會越做越灰心，好氣餒，挫敗感好重。當你做到飯都無時間食，尿都唔得閒屙，然後見到上面啲人派魚蛋燒賣，拍片叫啲明星唱歌畀你聽，點會唔想走？」
「但你仲做緊醫生喎。」