是咁的，照顧過我嘅護士死咗: 二百五十八、無人同我一樣

送完林林返屋企之後，心情好沈重。

一路行去搭車，都覺得雙腳好似唔係自己咁。

如果唔係有枝拐杖撐住，我諗一早就仆咗喺地上面。

返到屋企，依舊無人。

琴晚嘅熱鬧，對我而言恍如隔世。只係一日之差，世界已經變了樣。





即使我同德仔嘅見面同相處時間並唔多，但依種痛心嘅感覺依然喺體內陰魂不散。

我忍唔住諗，如果死嘅係我身邊好近好近嘅人，我又會唔會抵受得住痛苦嘅衝擊？

頹廢咁坐喺電視前，準備不停轉台，但我突然發現，其實琴日晏奏睇電視嗰陣，有一節新聞係講自殺⋯⋯

跟時間推斷，好有可能就係報導德仔嘅死訊。

而我⋯⋯竟然無情咁轉台⋯⋯





「⋯⋯懷疑同廣華醫院發生嘅醫療事故有關，該男護士誤用過期縫合線為病人縫合傷口，疑因此受情緒困擾自殺。醫管局話，會成立調查小組⋯⋯」

電視播放住新聞，但每聽一句都好似拆緊我啲骨咁。最後我終於忍唔住，熄咗電視返房瞓。

問題係輾轉反側都瞓唔著，於是就開手機，見到好多網民討論緊德仔自殺依件事。

喺網絡，永遠可以聽到其他聲音。

有人認為佢以死謝罪天公地道，有人覺得會出醫療事故唔怪得佢，有人分析依家醫護人員供不應求嘅現況，有人鬧政府乜都唔做，有人覺得基佬係原罪早死早著，亦有人覺得受影響嘅病人好慘⋯⋯





但搵唔到有人同我樣，了解德仔背後嘅痛苦。