是咁的，照顧過我嘅護士死咗: 二百五十九、媽媽

結果我完全無瞓到，其實我返到屋企都天光，所以睇完網民嘅留言，我就去煮早餐食。

但望住啲材料，完全無胃口。

而媽媽亦返到屋企：「咁早起身嘅？」

一見到媽媽，內心原本靜止嘅湖水又再有暗湧。

「哇，你似成晚無瞓喎。」





眼淚又再泛濫。

媽媽靜靜咁陪住我，明明佢返完工都好攰，平時一返嚟就會即刻沖涼瞓，但今日為咗我而死頂。

佢坐喺我床邊。

我初頭唔敢同佢講咩事，因為我怕佢批評德仔。咁我心情只會更加低落。

但最後就被佢氹到講咗出口。





「我明嘅。」

得嚟嘅，係意想不到嘅回應。

「媽媽都曾經諗過自殺。」