是咁的，照顧過我嘅護士死咗: 二百五十六、黑紙

「同人配到都好，無時間傾計同出街，結果難得嘅一兩個對象都會搵新嘅人發展⋯⋯」

無家人，無愛人。

「咁⋯⋯我地呢？」友情，我相信係德仔僅有嘅寶物。

林林心痛咁搖頭：「唔夠架⋯⋯佢每日要見太多會歧視佢嘅病人，亦要忍受太多大籮嘅無理針對⋯⋯係一年三百六十五日，由做護士開始直到依家⋯⋯」

我愈聽，心口愈痛，好似每次心跳，都有血湧出嚟咁。





「佢已經好似一張浸到黑哂嘅紙⋯⋯我地只係兩點塗改液，幾努力都無可能將佢染返白⋯⋯」

拳頭不自覺想握緊，但我怕太用力會骨折，只好忍住。

「⋯⋯德仔從來無同我講過⋯⋯」

「因為你係病人，病人已經會受身體狀況影響而有負面情緒，所以德仔絕對唔會同你講自己嘅事，亦絕對唔會容許自己將負能量傳染畀你⋯⋯」

聽到依度，眼淚又不停咁湧出嚟。





德仔佢⋯⋯直到最後⋯⋯

「金仔，鍾意林林的話，記得向佢表白呀。」

「唔好令自己後悔，人生得一次架咋。」

嗰個無力遠去嘅背影，直到最後都為緊我著想⋯⋯

「你要加油呀。」