是咁的，照顧過我嘅護士死咗: 二百五十五、醫療事故

「送到依度⋯⋯得喇⋯⋯」林林一直無出聲，直到我送到去佢屋企門口。

睇佢個樣，似係終於冷靜落嚟。

「⋯⋯點解⋯⋯你話德仔係你害死？」

林林沈默。

「如果你唔講，我一定唔會瞓得著。我唔想⋯⋯每次個腦諗起你就自動同『害死德仔嘅人』聯想埋一齊⋯⋯」





林林耷低頭，開始將佢琴晚收到德仔死訊之後，同埋佢今日返醫院了解過嘅情況講我知。

「係⋯⋯因為我請假⋯⋯德仔幫手頂咗我嘅工作量⋯⋯先會導致出咗醫療事故⋯⋯」

「出咗醫療事故？」

「詳細請況，警方仲查緊，但係用咗過期嘅手術縫合針⋯⋯」

「但同佢會死⋯⋯有咩關係？」





林林嘆氣，表情痛苦咁為我由頭開始解釋。

「德仔佢⋯⋯因為鍾意男人，所以同屋企人鬧翻咗。咁多年嚟同屋企已經無聯絡，加上佢朋友又唔多⋯⋯做護士淨低幾多私人時間我地都好清楚，佢亦無時間識男朋友，就算玩交友app，佢個樣都吸引唔到幾多人⋯⋯」

林林講緊嘅，係我所唔知，而德仔一直獨自承受嘅重負。

雖然我未知同醫療事故有乜關係，但我都靜心咁聽佢講。