是咁的，照顧過我嘅護士死咗: 二百五十二、自我介紹

一路上，林林喺的士上沉默不語，我亦由得佢冷靜啲先再問詳情，唔係佢又喊。

我望向窗外嘅風景。

而實情係，我知依家一開聲，我都會失控咁喊到收唔到聲。

無論點強忍，德仔嘅面容、女性化嘅動作、高八度嘅語氣、燦爛耀眼嘅夢想，都喺我腦中徘徊不散。

淚水要缺堤，只差一條導火線。





回憶，永遠都係燒毀保險絲嘅火焰，而且一旦開始諗，就會接二連三咁爆發。

我仲記得第一次見到德仔嗰陣，佢嘅自我介紹。

我係醫院常客，而佢係新人。

「我叫德仔，負責睇你嘅。我基架，你有唔滿意驚愛滋要換人好早啲講喇。」

我望住佢，當時我以為佢只係講笑。





「哈哈，唔介意啊。依幾日麻煩你喇。」

唔怪得嗰一刻，德仔遲疑咁呆望咗我一刹那。

德仔展露微笑。

大概係因為，歧視佢嘅病人太多，佢先會第一句自我介紹就預判我會想換人。