是咁的，照顧過我嘅護士死咗: 二百五十一、大家姐

我無問林林點解會食煙飲酒，因為如果我嘅好朋友出咩事，我都會借酒精暫時麻醉自己。

「你嚟到就啱喇，我同班姐妹仲有下場，你送佢返屋企啦。」

大家姐拍一拍林林：「有需要隨時搵我。」

林林點點頭，大家姐指住我：「靠你架喇！」

我地兩個交換咗聯絡方式，方便有事嗰陣搵對方。





我都唔知佢同林林算係感情好定唔好，感情好的話點會唔送佢返屋企自己去下場？但感情唔好又點會陪住林林安慰佢，而且連心情都受影響呢？

「呃其實我仲要睇住我朋友⋯⋯」

「得啦我幫你幫掂，我會叫老闆娘幫你睇住佢。伏喺度好似條魚嗰個麻甩佬吖嘛。」

「咁⋯⋯唔該哂。」

「得啦得啦，的士！」





紅的停低。

「司機，南山邨吖。」大家姐將所有野一手包辦，送咗我同林林走。