是咁的，照顧過我嘅護士死咗: 二百零八、畫具
我久唔久就會開手機望下，見到林林「在線上」就會覺得佢好似同我有連繫咁。
但又會因為佢無回我而覺得失落，真係矛盾。
嗰晚，我攤咗上床後，典嚟典去都瞓唔著。
心入面不停諗住同林林喺彩虹橋嗰陣嘅畫面，揮之不去。
既然無人幫我地影合照，無人幫我同林林嘅背影定格，咁不如由我嚟為嗰一晚定格。
畫畫搵食唔得啫，畫幅畫送畀林林，得喇啩？
依個念頭一浮上腦海，我就按捺唔住要開始畫畫嘅衝動。
問題係我有無工具呢？我開始去搵下啲櫃。
鉛筆、白紙、木顏色⋯⋯工具竟然出奇地齊全。而喺我衣櫃深處，仲有好多唔同嘅畫具，我一直無用過嘅生日禮物。
媽媽雖然唔讚成我全職畫畫，但佢始終都知我係鍾意畫，所以我每年生日佢都會送下平價畫筆同顏色筆畀我。